呢段期間, 陸陸續續收到之前從不同地方訂購嘅物品, 呢D都係普通嘅supplement, 3隻豬都可以用; 但訂購嘅時候, 個心係諗住幫豆b, 希望佢嘅病有改善, 唔會咁快走 😭
心臟supplement ubiquinol, 原先喺iherb訂購, 但已經缺貨好耐, 等完又等決定唔再等, 直接從原網訂購!
仲有Vit B complex,早前喺FB某群組, 睇到一篇講及腎臟病狗狗建議嘅補充品, 包括有魚油、維生素 E、輔酶Q10、維生素 B群、維生素 C、 牛磺酸、中草藥八味地黃丸等等; 以上所提及嘅, 其實大部份之前我都有比豆b用緊!
Vit B complex係我大意, 咁普通嘅supplement我竟忽視, 其實之前帶豆b睇醫生時, 幾個醫生都有建議, 話Vit B對豆b有好處; 當日帶豆b見Dr Lee, 仲即時同豆b注射咗Vit B12,佢話如果見到好效果, 就每星期帶佢去打一次.
可惜我就係見唔到有明顯反應, 豆b都無預期效果, 無精神咗, 亦無開胃咗...
我直覺係無用, 於是不了了之!
當我睇返呢篇資料, 已經立即從美國訂購一隻液體B complex, 見到所有feedback都係5*, 信心大D!
可惜豆b都等唔到去試.....
維生素B群 - 維生素B群是水溶性，慢性腎功能衰竭的狗狗因排尿太多容易流失。維生素B群是幫助建立新的紅血球細胞（或預防貧血）的重要組成部分。因此補充大量維生素B群在體內參與能量生產的代謝過程中起了重要作用。(群組轉貼)
然後,就係有關中藥, "八味地黃丸(又名金匱腎氣丸)", 其實我對呢隻藥並唔陌生, 打從豆b確診有蛋白尿, 我搵資料時就見到好多中醫嘅介紹; 但我擔心中藥同順勢療劑有相沖, 熟識順勢嘅朋友又話會有衝突, 我即使想用都有猶豫!
Rehmannia 8(中草藥Chinese Herbs) - 八味地黃丸，即使當腎臟已有60％到70％不再工作也可以增加腎臟血流量，剩餘能工作的腎小球細胞仍然能夠提供足夠的血流量。(群組轉貼)
網上亦有介紹:
其治療慢性腎炎的療效比治療急性腎炎好，
尤以伴高血壓者療效為佳，
對合併水腫型的患者也有較好療效。
能迅速消除蛋白尿及水腫，促進腎功能的恢復。
在治療方面，腎性蛋白尿康復相對緩慢，中藥可以在辨證基礎上通過益腎固精，祛濕化濁等方法治療。
之後, 無意中又睇到外國網頁, 又再提及"八味地黃丸", 見到中外嘅資料都推介, 我希望好大, 實在好想比對twins試吓; 的起心肝認真去請教, 中藥同順勢療法究竟可唔可以夾?
答案係隔開半小時就食得, 我都再上網搵料, 建議都係咁!
當日見豆b情況無大改善, 仍係有嚴重蛋白尿, 就下決心試吓; 買咗返嚟又慣性同豆b影張相, 但都未開始試用, 豆b病情就急轉直下, 今日睇返呢張相, 諷刺又心痛!
依家我比波波用, 希望豆b會守護細佬, 但願波波嘅蛋白尿有改善, 呢隻中藥可以起到作用啦！
 |
| 豆b, 我係咪應該早D試呀? |
 |
| 希望波波得到療效 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
