2016年11月3日星期四

感覺失落 (w/album)

自從豆b離開, 波波明顯唔同咗, 可能少咗個玩伴吵吵鬧鬧, 好寂寞; 好多時見到佢走去豆b常坐嘅地方, 用鼻仔猛索, 少咗個嘔氣對象, 真係好唔妥!
我唔知動物嘅感覺, 但見到佢好多時若有所思滿臉失落, 我自己都未放下難過, 見佢咁更心痛多咗!

朋友話我負面情緒影響咗波波, 佢接收到我因豆b離去嘅唔快樂, 叫我要放下自在!
要放下談何容易啊!! 豆b走咗祇係兩週, 佢嘅用品我都未收妥, 仲有強烈嘅不捨感覺, 咁短時間我點放得開?
已經盡量唔刻意去諗, 唔想有負能量, 亦明白豆b嘅一切已告一段落, 目前要focus照顧呢兩隻豬仔, 希望身體得保健康!

大家都叫我唔好困喺屋內, 滿屋回憶只有加強失落, 而且波波都需要將不安釋放, 帶佢出去跑吓最適當!
一連三日都同兩隻豬出去曬太陽, 出咗去波波舒緩情緒係有幫助, 而我行住往常帶3隻豬經常走過嘅路, 感覺好淒涼, 滿腦充斥住豆b一路行一路問攞零食嘅樣!
無咗豆b, 一切都唔同晒樣.....

即使物是人非, 都係要出去唔應該逃避, 起碼行完之後, 兩隻豬都瞓得好穩當; 而我雖然係有難過, 但總好過困住囉!
我同波波都一齊用grief eze, 再比D時間我哋, 一定可以安然渡過!