 |
| 個心肝碇都係唔開心 |
就係咁企咗喺高處嘅盡頭, 無前路, 因爲無勇氣爬落去, 望回頭路又見閘門已関, 無回頭路可行; 呢個夢係寓意乜嘢? 但就嚇到我半夜醒曬!
我諗我應該係壓力大, 湊呢幾隻豬面對咁多風風雨雨, 漸漸感到前路難行!
養育毛小孩其實同養個人仔付出一樣大, 除非你衹當佢係消遣工具, 有時間就搵佢嚟玩吓; 我就一直當我嘅毛孩係仔女咁養, 有乜大小病痛都擔心到騰曬!
今次豆b嘅病令我挫折感好大, 原來盡心盡力每年驗血聽心肺做檢查, 都唔保得住一個正常嘅健康狀態, 信心失晒!
我知咁諗係唔啱, 其實有好多因素做成結果有偏差, 尤其醫療上有更多不明原因係搵唔到答案, 自己做咗咁耐醫療界別點會唔知吖; 但從來理論同實踐都係會有出入, 遇事有負面諗法都屬正常啦, 我當然唔可能從此唔見醫生, 但真係需要過渡嘅時間!
好擔心波波基因可能都係差, 又遇上佢胃口差仲作嘔, 無形中比自己加壓, 其實我係應該帶波波去做個徹底檢查, 驗血、超聲波、X光都做齊啦; 但我怕...好怕好怕知道個結果, 同豆b不相上下, 實行鴕鳥政策!
今早波波胃口正常返, 肯自己去食唔使左氹右氹喇, 便便都好靚, 作嘔應該係同腸胃問題無關; 上次有過類似經驗, 係佢想推出痰液, 嘔咗就舒服喇; 波波氣管一向敏感, 轉天氣真係要加倍小心!
仍要繼續觀察, 希望佢一切正常唔使急住見醫生啦!
餵完早餐同兩隻豬一齊再瞓覺, 另一個惡夢再來襲 - 拖住波波行街街, 突然甩咗手帶, 波波一枝箭咁向前跑, 衝咗出馬路中間, 唔知點會爬上咗一駕巴士背後, 然後 - 巴士開動喇...
結尾會係點?? 巴士開動甩咗波波落馬路中間? 還是就咁載走咗波波喇…
太恐怖, 未有結局已經嚇到彈起, 呢個夢潛意識講咗我好怕失去波波, 嚇完一次又一次, 唔敢再瞓喇; 近十年已經無發過夢, 近日搞咩呀😱!
