 |
| 呢隻豬抽血超緊張, 醫生話包住返屋企先拆紗布啦! |
當局者迷, 又可能自己諗埋一邊, 見波波唔開胃, 就先作咗壞打算; 又憂心佢同豆b一樣, 事關佢哋同胎, 波波都係有蛋白尿嘛!
的起心肝去搵原因啦, 點知見嗰個L醫生又有戲劇性轉變, 同朋友B媽講及個診斷咁負面, 佢再提我都係試比順勢療劑先, 再作打算!
呢兩日我密集式咁比佢食牙齦炎療劑, 因為間中有見佢用手撥口仔, 有可能係牙肉痛卦, 食咗後又似乎胃口有好D喇; Ka同波波做傳心, 但feel唔到佢有大病痛, 原來佢唔肯自己食, 其中一個原因, 係佢話以前豆b都係咁, 佢就照跟!
其實我都覺得波波喺豆b走後有D古怪, 佢好多習慣都跟咗豬豆, 例如每次開餐前豆b一定去片片尿尿, 依家波波都係咁, 又例如我哋食晚飯時豆b會坐喺老公前面等, 以前波波係自己返床仔瞓, 依家佢就同豆b一樣, 坐一樣嘅位置去等, 仲有....我每次去洗手間, 波波都會嚟等我啦!!!
正因為整個模式都同豆b相近, 我先驚到騰, 就直覺佢係身體出事喇!
依家冷靜咁諗, 係咪豆b返嚟同波波傾過, 叫細佬代替咗?
好玄, 好難相信, 但事實係咁; 以前嘅我一定唔會信, 豆b返嚟見過波波??!!
本來見波波已經肯食返, 已經較放心, 我覺得牙痛可能性極大, 往常會告一段落喇; 只係咁啱無意中網上睇到有狗狗洗牙後發現有蛋白尿, 又有醫生提及慢性牙齦炎有可能影響個腎, 又嚇到我失晒魂!
 |
| 琴日狀態差, 一入診所已經超緊張 |
波波嘅牙石好嚴重喇, 亦有蛀牙, 都有好幾隻牙仔搖吓搖吓, 今次唔食都可能係牙痛啦, 我應該點做先啱?
真係勁擔心, 已經唔止一次聽到毛孩祇因洗牙, 而誘發出問題而喪命, 就講B媽, 佢到今日都後悔做咗呢個洗牙嘅決定, 因咁無咗個心肝啦; 我完全接受唔到, 如果波波因為洗牙出事, 我會發癲㗎!
 |
| 驗血無可避免手仔瘀, 佢唔合作係咁縮, 無法! |
但逃避都係唔啱, 唯有見醫生, 商量一個比較好嘅辦法; 今次睇F醫生, 佢好好人, 從醫生亦從家長嘅角度去幫你諗對策!
聽晒我咁耐以來波波嘅病歷, 亦考慮咗之前醫生嘅評語, 如果"無生命危險就唔做麻醉" 咁波波現況係正常, 邊有生命危險呀?
佢話牙仔咁差醫生角度一定要處理, 但如果佢氣管咁敏感, 亦唔止一個醫生話過免得過都唔麻, 講到要咁博, 佢就交返個波比我喇, 有無必要係呢個時候咁博呢?!
 |
| 搞完一輪謝晒, 我都頭暈暈, 太緊張喇 ;p |
佢明白今次係豆b嘅病況動搖咗我, 既然我擔心肝腎, 就先從呢方面著手, 一步步去諗; 先驗血, 再驗尿, 睇咗報告先著手跟!琴日驗咗血, 做埋離子檢查, 報告真係唔差, 肝腎指數都靚㗎,亦都無貧血啦; 如果唔係因為豆b嘅血檢咁奇特, 今次報告我會好放心, 不過依家我知道咁都未必無事啦!
醫生話試紙驗尿無數據跟, 有蛋白尿唔知有幾嚴重, 都係去化驗所做較準確喇!今朝一早拎咗波波第一次小便去做化驗, 有報告再跟進, 睇咗報告再作後續喇!
 |
| 今早精神返晒, 好哋哋又真係唔想去博去做麻醉洗牙嘛! |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
