波波今朝作嘔, 見佢chok吓chok吓弓住個身, 但無嘢嘔出嚟又好唔精神, 可能天氣突然轉涼隻豬冷親, 琴晚已經比佢哋上大床一齊瞓; 我今朝早無比佢食早餐, 等佢個胃休息吓再觀察, 呢幾隻豬都係要我擔心, 想輕鬆吓都難!
佢一直瞓, 直到終於嘔出一啖痰, 就開始精神返, 我過咗一陣開始比佢食一茶羹食物, 測試吓胃口; 波波食得好快, 無晒之前唔肯食嘅狀態, 咁當然一茶羹食物唔可以作準則, 但佢肯食我就較安心喇!
 |
| 其實鋪咗遠紅外線氈已經好暖 |
同佢哋著返件薄衫, 唔鍾意都無法, 年紀大咗身體變孱, 都要妥協啦; 平穩過渡咗兩個鐘, 再比波波食兩茶羹肉, 佢好似意猶未盡, 更安心喇; 就係咁少食多餐慢慢比佢食, 一路觀察, 再無見有異常狀態, 都無再嘔, 漸漸精神返!
因為波波唔舒服, 連累達達都無得去街, 兩隻豬百無聊賴齊齊瞓覺!
 |
| 都係唔開心嘅表情, 出咗街係好D嘅! |
休息過後波波漸漸正常返, 亦無再作嘔全仗嘔出一啖痰, 可能天氣轉變冷親氣管卦, 希望唔會係有更大麻煩, 我依家小小事都好擔心啊!
波波情緒比幾日前係有改善, 好似開始想同達達玩, 但又唔想咁啦, 見佢都係望住達達無埋身, 表情都係唔開心, 你叫我唔相信動物有靈性點可能啊?
