是否情緒病?

波波呢兩日又唔知發生乜事, 兩日前瞓覺嗰時都正正常常嘅, 一覺醒來就唔知做乜, 掂下都細細聲尖叫, 同兩個月前出現過嘅情況一樣，甚至係更差; 上次佢都肯食嘢, 今次就連早餐都無心機食!
我檢查過佢嘅口腔, 又全身按摸過, 連皮膚都check埋, 都無發現有異狀, 唯有觀察住, 睇吓過多一日會唔會無事啦!

今日瞓醒, 佢有正常去廁所尿尿, 睇過尿尿都正常, 但比佢食早餐, 佢唔食仲係咁全身震哂, 即刻同佢探熱, 溫度正常!

無辦法唯有試吓用手一粒粒餵佢啦, 好彩佢肯食 ;午餐比較好少少, 雖然都係唔肯自己行埋兜肉度, 但我拎住個兜佢都肯食, 唔駛好似早上咁一粒粒餵喇!

究竟係乜嘢事呢? 純係情緒問題, 還是身體出現狀況? 唯有再觀察住啦, 因為佢唔肯彎低頭自己食, 有D擔心會唔會好似以前安安咁, 有骨刺壓住頸嘅神經線呢? 

到咗晚餐時間, 我正想拎起個糧兜比佢, 佢竟然主動行過去, 彎低頭自己食! 我屏住呼吸唔敢打擾佢喇, 難得佢肯食, 好開心佢食完仲去埋廁所便便添!

似乎唔係頸椎出問題喇, 都安樂少少, 隻仔又唔識講乜事, 都係擔心啦! 生理上睇嚟佢一切正常, 就算要同佢睇醫生, 都唔知要睇乜呀!
咁又係心理問題? 都無發生過特別嘅事, 點解呢隻仔變得咁敏感架!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！