 |
| 相片連結 |
一轉眼間已踏入咗2012年, 不足一個月, 又到農曆新年喇; 人哋話年紀越大, 就覺得日子過得越快, 唔通係真?
呢幾日都照常同三隻豬仔行街街, 不過假日路上都係比平時多人, 尤其遇到果D無養狗狗concept嘅人, 真係好無奈!
好怕D人突然伸手摸達達, 其實任何狗狗對特如其來嘅舉動都會緊張; 我明白佢哋都係見到狗狗得意先會逗佢哋, 但就做成佢哋好不安; 每每遇到幾個咁嘅路人, 豬仔們就無晒mood, 達達垂低晒尾仔, 豆b又唔肯行, 波波就會做出好多安定訊號!
我試過將時間押後, 傍晚先出去, 但達達更家緊張, 因為開始天黑喇; 而且晚上無陽光較涼, 又唔係咁適合!
好彩假期過去後, 一齊回復正常, 今日同佢哋出去就無左呢D顧慮, 佢哋都行得好enjoy喇!
講起過年, 唔知係以前物質無咁豐富, 還是係一個習俗, 過新年買新衫變成咗我嘅一個期待; 諗番自己細佬哥時候, 真係好似要等好耐, 但講真我好懷念嗰種等待過年買新衫嘅感覺!
依家一年到晚都買, 買, 買; 已經買到無咩感覺! 物質豐富應該係好事, 代表咗社會有進步, 但相對感情上就好似空虛咗; 可能年代唔同, 總覺得以前過年過節都有較濃嘅氣氛, 而人情味都比依家濃厚! 成日想當年, 真係要認老喇:)
仲好記得好多好多年前.....我嘅童年時代, 每逢過農曆年, 媽媽都會聯同好多左鄰右理, 一齊泡制賀年食品, 幾個家庭鬧哄哄, 每人負責唔同崗位, 而我哋班細路, 就伸長條頸等食; 睇住D應節食品出爐, 跟住一齊試食, 然後每個家庭分番自己嗰份, 開開心心咁拎番屋企! 可惜天下無不散之筵席, 好鄰居都搬離至各散東西!
仲記得好多年前.....我婚後有埋女女, 每逢過農曆年, 媽媽都仲會自己做賀年食品; 睇住香噴噴嘅蘿蔔糕出爐, 仲有年糕, 馬蹄糕...., 每到年三十晚, 媽媽深夜都會煮齋, 一家人圍埋食少少先去瞓覺, 呢個係我哋嘅一個習慣! 可惜天下無不散之筵席, 呢個習慣只維持直到幾年前媽媽過身!
依家過年過節, 再無見過熱辣辣嘅自家制應節食品, 有嘅只係從外面買番嚟, 雪到凍冰冰再拎去番熱嘅糕點; 更再無一家人深夜圍埋一齊食齋, 有過好幾年阿女都無喺香港過年喇!
過年, 對我嚟講, 已經無咗細時嗰種期盼, 反而有少少失落; 即使刻意去做一D過年嘅指定動作, 例如一家人食餐團年飯, 行年宵買吓年花, 感覺都好似係例行工事, 只希望過去有嘅唔好消失得無影無踪!
時代轉變, 日新越異, 人就連感覺都好似麻木咗, 情懷不再!
還好有幾隻豬仔, 乖乖咁比我擺佈(希望我無將快樂建築喺佢哋痛苦身上啦)!
等我可以佈置影吓過節相, 過時過節嘅氣氛, 就要喺呢D相片中去找尋喇!
 |
| 今日去街街3隻豬仔都好開心! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
