8年前嘅今日, 叻叻離開咗我!
叻叻嘅離開仲好似一場夢, 好唔真實; 關於佢嘅每件事都仲歷歷在目, 影像深刻; 不過即使感覺再真, 但一切都已經再觸不得, 碰不到!
日常生活中, 有近似同叻叻相處時發生嘅事件, 即使係最零星嘅畫面, 都會令我諗起叻叻, 個心就會一下下咁抽痛!
記得叻叻唔敢行木地板, breeder話佢曾經跌得好痛, 但叻叻好勇敢, 努力克服, 終於佢可以行到, 仲行得好好!
要記住嗰段最開心嘅日子, 叻叻健健康康, 無病無痛，我哋一齊生活得開心輕鬆!
然後, 屋企開始烏雲密佈, 愁雲慘霧, 叻叻病重, 我哋一家都生活喺惶恐當中; 每當叻叻病發抽筋, 行到跌跌碰碰, 休克失禁四肢扭曲, 我個心就勁痛!
 |
| 咁fit嘅size一定唔舒服 |
叻叻有脫毛症, 全身上下都甩光毛毛, 為咗怕佢磨傷皮膚, 要幫佢著上衫褲, 可惜當時未流行網上銷售, 要買一件衫連褲仔, 行好多寵物用品店舖, 都徒勞無功！
好唔容易買到番嚟, 都唔合用, 日常家居穿著係著重舒服, 唔係要款靚我哋又唔係model要出時裝show!
 |
| 做咗呢條舒服但唔靚嘅褲 |
考慮完布質, 原來size都係另一大問題, 買一個適合嘅size, 行就無問題, 坐低就會扯住唔舒服; 長時間著住仲見到磨紅晒個脾罅位, 見到勁心痛!
買大一個size? 行兩步褲管就滑咗出嚟, 要搵一條質地柔軟, 合我要求, 用作保護, 原來困難重重!
為咗保護叻叻嘅皮膚, 唯有自己親手做, 唔需要靚但要舒服, 剪咗一件T恤, 做咗條褲仔比叻叻寶 :)
 |
| 著住袖套嘅叻叻 |
再後來, 叻叻病情加重, 要留院治療吊水落藥, 剃咗手仔嘅毛毛; 還幸病情受控, 但出院後叻叻心情唔好, 見到無毛嘅手手, 咬到血肉模糊; 見到無毛嘅手仔得一條骨仔幼幼已經心痛, 再咬到流晒血真係唔知點好, 唯有再為叻寶做個袖套.
叻叻, 媽媽為你做嘅每針每線都係愛, 你是否知道！
.jpg)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
