可能3隻豬年紀漸長喇, 過多3個月對twins都8歲, 達達都足7歲半啦, 係咪身體基能開始轉弱? 身體開始出問題喇?
豆b嘅頸椎睇咗兩次醫生, 食咗兩個療程嘅放鬆肌肉消炎藥, 係比初病發時好番好多喇, 但都仲會見到佢有時要就住向上望, 咁即係未完全康復啦; 無可能長期依賴呢D藥嘛, 就算幫到條頸, 長食一定肝腎受傷, 兩者取個平衡, 我唔比佢再食藥喇, 就勤力D幫佢做艾炙, 照燈同場效應治療, 我諗呢類問題, 康復真係需要時間, 唯有戴番個頸箍幫吓, 困籠比佢多D休息, 嚴格D限制活動啦!
要拿捏點係最好都好難, 完全唔比佢正常活動唔得啦, 無郁動會排便困難, 而且肌肉都要強化嘛!
近期豆b氣管好差, 我希望係呢D壞天氣影響下, 而唔係年紀大咗影響佢頻密病發!
一直都知道豆b氣管差, 個個醫生都係咁話, 我都有心理準備年紀漸大, 有心臟病都唔出奇啦, 但心理準備只可以騙自己, 要面對問題嗰下, 咪又係嚇到死死吓!
呢隻豬近來呼吸真係好得人怕, 條脷仔成日都變瘀色㗎, 一見佢又喘氣頭仔昂高, 我就手都震埋, 九秒九準備好比佢聞氣喇;一直我都只係用蒸餾水, 依家改用生理鹽水應該會好D啦!
好彩仲算控制到, 見到佢條脷仔顏色慢慢正常番, 心中大石先放下!
我點先可以避開佢興奮同緊張? 根本有時我都莫名其妙, 佢就猛喘喇; 如果成日係咁, 總會出事嘛!
呢種氣管下塌又無法根治, 目前我可以做嘅都係比佢聞氣, 用香薰or順勢藥等佢calm down, 最多都係加埋氣管放鬆藥啦, 希望咁可以過渡最重要嗰剎那!! 未面對過真係想像唔到嗰種驚嚇, 好似下一秒就死得喇!
喺youtube度搵到條片, 豆b病發嗰下就係咁喘啦 :(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
