 |
| 相片連結 |
琴日同波波沖涼, 跟住修剪毛毛, 不過修完工人姐姐話都唔覺有剪短喎; 但其實都修咗唔少㗎, 比較起舊相片就見到有分別; 咁當然, 出自我手就點都唔會好短啦, 一來我自己唔鍾意剪得太短, 二來要剪短我功力未夠, 好難預算 :P
依家3隻豬椎間盤都有事, 我好難再放心比其他人剪喇, 要就住姿勢又要托腰, 耐性唔可以少, 剪齊整D就算喇!
自從豆b頸椎出事, 促使我更勤力幫佢哋做物理治療, 每日3次艾炙, 照燈, 場效應治療, 唔敢間斷; 波波同達達雖然比豆b臭脾氣, 但都好樂意做每種治療, 做照燈, 場效應全無難度, 只要開咗部機, 就連波波依家都會乖乖伏低, 唔會兩頭轉; 豆b呢, 就好似個風車咁, 轉呀轉, 估唔到最難服侍係呢隻豬 :(
每日3次, 有3隻豬, 每次半小時, 幾種治療加埋用上嘅時間都唔少, 還好波波達達可以一齊做場效應治療, 唔係都唔知D時間要點計算, 我已經所有時間都比佢哋霸佔 ;)
有網友話一定係我前世欠咗佢哋要今世還, 唔通我前世真係欠落好多債? 隻隻狗狗都今世番嚟要我報恩? 我都覺我好似係還緊債喎 :P
純係講笑啦, 我無宗教信仰, 亦唔會諗到前世今生咁複雜, 只不過我好鍚3隻豬仔, 希望保養好佢哋嘅椎間盤唔好有惡化, 慢慢有好轉啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
