琴日豆b好反常, 竟然早餐無食晒, 仲要自己行返入籠瞓覺, 咁情況我真係好驚; 即刻捉佢出嚟慢慢測試, 見佢行得好慢, 頭仔唔敢枱高, 只用兩隻眼仔向上望, 見佢咁嘅反應, 都知係條頸又出事喇!
即刻打去太平道診所book時間, 今次我指明一定要睇呂醫生, 佢係全港唯一有動物神經科執照嘛; 診所話呂醫生full晒喇, 但豆b有睇開呢科, 幫我問問呂醫生再覆我啦; 無耐呂醫生親自覆電話, 問咗我一D相關問題, 都話想見一見豆b, 明早插隊比佢睇, 叫我同佢禁食, 睇睇有無需要照MRI喎, 先繼續比佢食藥, 等症狀舒緩咗先!
今早準時見醫生, 呂醫生問得好詳細, 日常生活習慣, 有無去街, 食咩食物, 一日食幾多次都問齊, 仲有問有無咬玩具fing 來fing去, 同其他狗狗相處模式.....總之好細節嘅問題都清楚記低!
當講到豆b打乞嗤打到好勁, 連續咁打, 佢就搖晒頭喇; 佢話人勁打乞嗤都椎間盤出事, 呢D好難幫到佢啦 :(
呢D先天體質又無藥醫, 醫生建議嘅野我又做齊, 佢都有提話照燈, 艾炙都幫到, 我都做晒啦; 咁醫生話只可以靠佢自己生生性性喇!
豆b狗仔細細, 條氣管仔丁咁大, 插喉已經難, 仲要呼吸咁差, 氣管下塌, 根本無得攪; 要麻醉風險好大, 拔喉嗰下有機會換唔到氣, 係好大比數醒唔番, 就咁拜拜 :'(
豆b嘅劣勢係佢唔可以麻醉, 無得做MRI確診亦無得做手術, 我只可以小心盡力保住佢喇!
我真係保佢大喇, 即係一個計時炸彈, 唔可以麻醉問題好大嘛, 有咩事要醫都無得醫啦, 最慘唔係病症本身嘅問題, 就算跌斷手脚都可以攞佢命, 係關乎麻醉嘛！
我呢3隻豬, 全都係玻璃豆腐, 掂吓都驚散, 以後公關豆b都要除名喇!
今日多謝A陪我見醫生, 仲有V同Mi都有提出話陪我去, 真係好感謝你哋; 好幸運養呢3隻豬仔, 令我認識到咁多志同道合嘅好朋友, 你哋咁關心豆b, 衷心感激!
睇完專科, 知道豆b唔算係好大件事, 都鬆一口氣, 往後嘅日子唯有盡我所能小心D! A話診所好近旺角街市, 有心情可以行過去, 買梭羅魚煲湯孝敬3隻豬, 自從上個工人姐姐走咗, 年幾以嚟都未飲過囉; 仲買咗好新鮮嘅龍躉魚, A話膠原豐富好甜美, 從來我豬仔嘅伙食都真係好過我自己 ;)
 |
| 梭羅魚 龍躉魚 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
