 |
| 相片連結 |
豆b睇咗醫生按時食藥, 頸仔問題暫時穩定落嚟, 但要靠呢D消炎止痛藥都係弊, 如果好似之前咁一停藥又番嚟, 咁就死啦; 呢類藥長食真係有問題, 雖然問過醫生話OK, 對肝腎傷害唔算極大, 好多唔可以做手術嘅狗狗都係要長食啦!
係無得選擇無得揀咋, 上網search過, 其實真係對肝腎唔好啦, 可能係唔好之中嘅最好卦; 但唔可以移除病灶, 我仲有咩可以選擇?
上次停藥後我有嘗試比豆b用順勢治療, 但佢唔夾, 食住順勢藥都一樣病發 :(
真係好驚壓制到呢個病, 又到其他器官出事啦!
人生真係好無奈, 好多嘢都係無得揀, 明知條路行落去遲早出問題都要繼續行!
但願豆b食完今次嘅藥之後會好番, 安安以前頸椎出事都係食咗一個療程嘅藥, 一直無復發, 希望豆b都一樣咁幸運啦!
我從來都無偷懶, 即使波波無再病發, 達達情況穩定, 我都無鬆懈, 好勤力幫3隻豬做物理治療, 希望個天唔好同我玩啦, 我唔噙嚇㗎!
今日又同達達浸微泡, 一來佢甩毛越見差, 肚仔毛毛薄到見肉喇, 希望浸密D新陳代謝會加快, 血氣運行好D啦; 二來佢腰椎咁差, 自己都少咗行, 咁少運動真係怕肌肉萎縮嘛, 放深D水托住佢腰仔等佢模仿游水動作, 無壓力下運動吓四肢啦!
自從波波同達達瞓咗張新床, 我總算可以瞓番一覺, 唔使一晚醒幾次啦, 兩隻猪好快都習慣同以前一樣, 一齊瞓覺! 豆b以前無需困籠, 但依家要執行嚴格, 真係唔想佢條頸再出事喇, 無人會知道下次有幾嚴重啦; 見佢喺籠入面望住波波同達達, 好似好渴望上去張床瞓吓, 個樣好慘, 都會放佢上去還佢心願, 但都驚呢個小器波波唔開心架!
不過好奇怪, 波波見我放豆b落去同佢哋一齊都ok, 無唔開心亦無兇佢; 唔通狗狗真係咁有靈性, 波波知道豆b頸仔有事就是旦, 讓吓佢啦?
呢隻仔都幾有"人"情味, 只要豆b唔同佢爭食, 唔同佢爭媽媽就ok喇 :)
今日煲梭羅魚湯比3隻豬, 好濃縮應該好鮮味, 但達達唔係好鍾意; 反而蒸龍躉魚, 佢就食到搶住, 達達真係公主, 唔吼平價魚 :(
飲完湯放晒佢哋上床, 歎住冷氣一齊瞓覺, 呢3隻豬仔都算好享受啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
