 |
| 3隻豬仔咁融洽幾好啊！ |
天氣持續唔好, 間中都有行雷落雨, 3隻豬仔呢排好少落街!
豆b頸椎出事同氣管變差係少出外嘅主因, 佢情況暫時都唔適合出去, 雖然話可以坐車唔比佢行路, 但都係唔安全, 遇到路途唔平坦蹬親咪死!
醫生話需要困籠, 一定有佢道理; 睇ivdd網站甚至列明籠嘅大概size, 困籠有幾重要可想而知!
今次我真係狠下心腸將豆b困細籠, 除咗3餐會放佢出嚟行入圍欄進食, 跟住便便完就立刻入監!
嚴守咗兩個星期喇, 豆b應該已經康復, 見最初放佢由個籠行去圍欄, 佢只係一步步慢行, 到依家一支箭咁向前衝, 就見到個進步啦!
開始試吓放佢入波波同達達嘅新床, 續步放鬆, 地方大D佢可以瞓得舒服; 二來隔離咗咁耐, 睇吓3隻豬可否和平共處, 抑或關係更家疏離; 尤其係隻波波豬, 一向都唔鍾意佢, 行近D都想打交嘛!
襯住達達豬同老公喺廳睇電視, 我放對twins一齊, 睇睇佢哋點樣相處; 見到兩隻豬都可以放鬆咁瞓覺, 即係無問題啦!
放埋達達豬一齊都無所謂, 佢已經唔怕自己嘅地位受到威脅, 呢隻刁蠻公主好識定位!
由起初只係日間短時間開始嘗試, 到呢兩晚過夜都可以放埋一齊; 養咗3隻豬咁多年, 3隻一齊瞓天光真係第一次 :)
希望往後都可以keep到咁樣啦!
近來少咗出街, 波波心境平和咗, 好少發脾氣; 我真係覺得波波出去壓力仲大, 之前產生嘅所有情緒問題都好似來自去街!
我唔可以話佢唔鍾意出街, 一出動架車仔3隻豬都仲會興奮到係咁跑, 但又明顯街外嘅人同狗狗帶比波波壓力大, 呢輪無出去, 佢真係好乖乖!
係咪佢真係根深蒂固唔可以接受人多狗多嘅場合? 外面比佢好大恐懼感? 我有無必要一定要逼佢社交?
咩係啱? 出街散步一定係釋放到壓力? 還是相反?
我決定順應佢性格, 只要佢開心就得啦!養狗狗原來真係無一條公式, 當日波波多病, 我無從細比佢接觸外界, 依家嚟講社會化可能真係太遲喇!
以後多D遊花園, 可以出去又無壓力啦!
生活非常平靜, 3隻豬食飽聽住音樂瞓覺, 瞓醒同佢哋清潔梳毛按摩物理治療, 雖然都幾忙, 但見到佢哋有進步好安慰 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
