 |
| 未加工前嘅扭蛋都好靚， 但加工後就變成獨一無二嘅3隻豬 :) |
呢幾日好似特別熱, 老公每日放工番嚟都話熱到就嚟溶晒, 咁當然唔會同3隻豬仔出街, 就算落樓下都要避免喇; 豆b條氣管一定頂唔住呢D熱浪撲面而嚟, 真係驚佢透唔到氣, 依家要24小時比佢涼住冷氣, 希望平安渡過呢個炎夏!
3隻豬唔出街好平靜咁瞓吓覺, 瞓醒兩頭行, 完全無打交, 就算我比零食時都無爭拗, 如果一直可以保持住咁樣我真係安樂晒!
琴晚食完晚飯, 波波行埋阿女身邊, 用個頭仔掃阿女雙手要佢鍚鍚呀; 阿女好驚訝, 問我波波點解態度變晒?
波波精神緊張已經好耐喇, 好似時刻都喺戒備狀態, 成日眼仔都碌到大一大, 阿女話見佢近日面部表情鬆弛咗, 估唔到進步到主動撩玩, 問我又做咗咩訓練呀?
 |
| 感覺波波表情係放鬆嘅 :) |
我近日由早忙到晚, 密密幫佢哋做物理治療, 連去街都無時間, 完全無諗佢心理上嘅問題啦, 要照顧好身體嘅毛病先嘛; 可能咁仲緩解咗波波繃緊嘅情緒, 無出去佢反而壓力無晒!
真係甲之熊掌乙之砒霜, 活生生嘅例子唔到我唔轉軚!
就等佢哋做溫室嘅小花啦, 過一段長時間等波波將唔好嘅記憶洗晒, 達達腰椎有力番, 豆b頸椎同氣管都穩定晒, 再從新開始試吓去街街, 就當比佢哋休養一段長時間啦!
今日忙裡偷閒又搵D嘢玩, 之前知道出咗有松松嘅扭蛋, 講真要扭到松松機率唔大, 仲要扭中我3豬就更難, 唯一途勁只有買; 但買都有困難, 一般出售都要全套買, 咁多犬種我又唔啱, 唯有上網猛搵, 到處留言問是否可拆散去買!
皇天不負有心人, 我終於集齊晒 :) 呢款扭蛋幾精巧, 我覺得好靚呀, 但要代表3隻豬仔, 就要加工喇!
開始加工描繪3隻豬嘅樣貌, 但條件所限, 因為公仔係塑膠, 上色頗難, 唯有盡量將特徵強調算喇!公仔細細有D難度, 但好好玩, 完全可以幫我減壓 😝
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
