 |
| 今日波波眼仔好精靈 :) |
早幾日波波見過眼科醫生後, 我就少咗一樣牽掛, 估唔到以前最豆腐嘅波波, 今日喺3隻豬入面, 變咗係最叻嗰個!
明明豆b有烈女嘅封號, 以前好勇猛, 點知頸椎出問題又氣管下塌, 呼吸咁差 :(
講到達達.......
達達腰椎出問題, 至今有半年時間, 經過咗各方面嘅治療, 慶幸情況無變壞, 其實有咁嘅效果我都心足喇; 近日見到佢情況仲比之前好咗, 唔通腦傳導果隻supplement開始生效?
當然物理治療同順勢療法, 再再之前嘅針灸, 效果都唔可以抹煞啦!
 |
| 兩隻豬乖乖做場效應治療,交叉手嘅波波好優雅 :) |
雖然佢都仲偶有脚震, 企得唔係好穩, 但比之前明顯有力, 仲肯行吓:)
我大部份時間都係將佢困喺大圍欄, 唔敢比佢再衝磚地喇, 萬一跣脚, 真係有機會變癱!
見佢情況穩定番, 就set番條隧道比佢走吓, 見佢開心咁穿穿插插, 我都開心埋 :)
分時段放波波同豆b入去陪吓佢玩, 有時又放豆b落新床瞓一陣間, 平等時間等3隻豬分組相處, 我發覺幾好喎, 無爭嘢無妒忌, 無打交, 無麻煩!
 |
| 毛量相若 |
至於達達甩毛問題, 唔覺有突破, 都同以往一樣, 慢慢變薄啦; 早前影端午節相, 對比番2012年端午節期間, 佢嘅毛毛係差不多上下, 如果一切跟住老路走, 應該到明年2、3月係最差!
當然 - 我希望今次唔需要落到低點先向上爬, 希望未甩到最差就接續到生毛嘅時間!
當然 - 我希望今次甩毛之後都仲可以重生, 畢竟年紀漸大, 基能會退化!
更當然, 我但求佢身體健康就最最重要喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
