 |
| 相片連結 |
今日係達達豬正式11歲生日, 不過...我無整餅, 阿女出咗trip, 要照顧多兩隻貓貓, 波波又傷眼, 每兩日要帶佢見一次眼科, 真係無心情兼無時間!
不過上星期去咗一個狗狗市集, 我呢段時間其實忙到頭都暈晒, 已經無咩多餘時間去行街, 如果唔係為咗想買一張靚靚松松氈仔, 我唔會去逛!
呢個係緣份, 註定達達有食神, 機緣巧合見到有即場做狗狗cupcake, 就即刻做咗一個比達達!
早一星期食生日餅都唔太過份, 起碼今次係11月, 係達達嘅生日月份😁, 今次媽媽無大頭蝦忘記喇!
個餅好cute, 餅店姐姐用達達相片跟樣做, 意思意思做隻松松, 不過都有好多人大讚係隻靚松😄; 蛋糕仔用料係狗奶薯茸, 達豬食得好開心😋, 波波就淨係食咗餅面嘅薯茸!
當日影咗相, 瞓唔著時就做吓裝飾, 諗住喺今日正日先post同大家分享; 都真係所有嘢都有個定數, 如果唔係上星期去咗市集, 達達今日生日我都無時間咩都唔會攪, 今日又要帶波波去見眼科, 邊仲有心情諗生日蛋糕吖!
感恩達達再食返西藥後胃口轉好, 有時真係不容我去選擇, 如果達達仲係小朋友的話, 我應該會盡量唔用咁多西藥喇; 但達達係BB婆喇, 我亦努力過啦, 祗好妥協喇; 都係嗰句, 生命不在乎長短, 只望佢食得瞓得, 開開心心就好喇!
波波嘛, 眼仔受傷要食隻勁嘅抗生素, 攪到胃口全無, 從未試過咁差狀況要出動針筒, 希望醫生今日會話佢有好轉, 快D食完個course再幫佢做排毒!
醫生話眼仔受細菌感染可以好快去到好差, 要每個鐘滴眼藥, 希望under control; 已經兩晚較住鬧鐘, 根本好似無瞓到, 勁頭痛又擔心, 一樣一樣壓到我氣都無!
達達豬嘅生日, 生日願望當然係兩隻豬食得瞓得, 身體無咁多問題啦; 一陣又帶波波去見眼科, 希望有好消息, 比件好事等大家都開心吓好卦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
