 |
| 相片連結 |
我依家覺得白內障好恐怖, 情況原來可以惡化得咁迅速, 對於一隻健康嘅狗狗, 要改正狀況最少都要全身麻醉做手術, 亦無人知道麻醉風險有幾高, 亦無從估計術後嘅後遺症有幾嚴重; 首先控制併發症方面有難度, 畢竟佢哋無術後靜養嘅概念, 即使接受手術後, 都好似困難重重😖！
如果狗狗身體狀況唔適合做手術, 就只好承受失去視力嘅痛苦, 仲要面對好多伸延出來嘅症狀, 好恐怖!
好多人同我講狗狗失去視力好易適應到, 但毎隻狗狗性格都唔同, 樂觀嘅狗狗可能好快習慣, 但對於神經質嘅波波, 就有好大難度!
波波有時都handle得幾好, 但有時佢又會信心全無, 甚至唔敢行去厠所, 就地解決算數😓; 當佢失去信心時, 就算抱咗佢上厠所, 要佢行返出來都唔敢踏步, 就咁儍儍企定唔郁, 作為媽媽嘅我睇見真係好心痛!
 |
| Video: 肯慢慢咁行已經好好👍 |
我當然知道要比佢support, 要比佢正面鼓舞, 時刻我都用輕快嘅語氣把聲調高 8度, 叫佢唔好傻, 媽媽一定會比佢最好嘅照顧, 要放心踏步, 媽媽唔會比佢受傷, 鼓起勇氣練習, 好快就會適應得好好!
但難題係要我內心都唔可以苦惱, 話佢哋有讀心術, 要我面對幾個月間風雲驟變咁急速, 仲要望住佢表情咁瑟縮, 我好難平靜到😭!
不停聽到大家嘅忠告, 要我先自己將情緒管理好, 如果可以控制我都想做得好, 呢D咁淺易嘅道理我係知道; 只係, 針唔到肉, 只可以想像係會痛, 但未真實被篤嗟!
從來企喺旁邊我都可以好清醒教路, 我都可以比經驗意見大家, 分享試吓點去做會更好, 但口講又同自己承受到底唔同, 點會咁輕鬆?
如果大家未有毛孩遇到麻煩你好幸福, 如果有過呢種經歷你有無忘記到? 當時嘅你真係可以咁面對從容? 或者你只係選擇忘記自己曾有過嘅驚慌、失措😂!
接受現實, 積極配合我有做, 阿女都照常比能量治療兩隻豬, 日常保養我有做好, 明白生活仍須正常繼續; 我會帶波波見醫生, 商討以後點做最好, 盡人事聽天命, 勉勵自己努力面對盡力做!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
