星期一已經帶波波見咗梁醫生, 不過真係要整理一吓情緒, 亦覺得好疲累, 總係要面對新嘅挑戰😓!
今次見醫生感覺好好, 無好趕急嘅感覺, 醫生都好有耐心瞭解波波嘅底子, 可以從細講起chemical對佢做成嘅禍害, 連波波依家食緊乜嘢補充品都瞭解得好仔細; 醫生比咗建議我可以作出取捨, 再調較份量, 呢次嘅診症算係好詳細喇!
然後入正題, 梁醫生話可以比波波試試用中藥, 但因為呢隻西藥控制波波嘅蛋白尿效果好好, 上次個報告好靚, 即使要用中藥取代, 都要循序漸進, 希望可以為波波打造一個最好嘅方案!因為我有講我幫波波減咗藥, 佢想波波再做一次UPC同尿常規, 睇睇目前係乜情況!
本來我想波波驗埋血, 因為上次做唔到, 可惜今次一樣失敗, 醫生話唔好太勉強喇, 既然波波咁抗拒就先睇驗尿報告!
今次睇醫生本來感覺良好, 醫生又有信心幫到, 可惜醫生check波波眼仔, 話有唔正常警號, 叫我要帶佢去比眼科睇睇先好!
已經接受咗個仔睇唔到, 每日都鼓勵佢開始練習慢慢踏出每一步, 點解又有新嘅issue😭?
天啊你可否唔好比我咁多難題, 我就快承受唔到, 咁嚴峻嘅考驗我好難背負....
已經過咗好多關, 從豆b到今日從未停過步, 我感覺好攰, 唔止係心靈疲累, 連肉體都攰到唔想郁, 週身骨痛!
無論點都要硬撐落去, 唯有再book專科帶波波檢查眼仔, 希望無太大問題; 今次睇另一位眼科醫生, 希望比到我新嘅指引, 會幫到個仔!
過兩日就要帶波波見眼科, 然後等驗尿有報告就比波波開始中藥, 個腦無一刻可以寧靜落嚟; 不過我好感恩仍有空間可以為波波努力, 我一定會堅强奮鬥到底!
 |
| 個傻豬仔心情好似比之前好咗 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
