懷住忐忑嘅心情帶波波見眼科熊醫生, 好驚佢又好似老師咁叫我有心理準備摘眼仔, 但竟然有意外驚喜, 亦好多謝醫生解釋詳細!
醫生話波波滴眼藥有正面效果, 已經無發炎, 唔記得清楚醫生講嘅咩前房後房, 淨係記得佢話已經無水腫, 眼球後面嘅液體無上次咁混濁, 繼續滴藥會慢慢改善落嚟!
眼球好似漏氣嘅問題就有待觀察, 不過即使係咁, 只要keep住無發炎就可保留眼仔, 我最擔心要麻醉手術嘅問題可以暫時放低!
老師提我問醫生, 蛋白液化滲漏會唔會影響個頭仔, 醫生話唔會有呢個問題, 影響頭痛係因為青光眼壓力太大, 要摘眼球都係因為劇痛太難抵; 波波無眼壓高, 眼壓讀數11好正常, 而消炎後亦唔會一直滲漏蛋白, 暫時滴眼藥已經可以控制!
醫生叫我唔使擔心, 呢隻眼藥好安全, 有狗狗滴咗6年到離世!
見完醫生我真係鬆一口氣, 只求波波唔使再麻醉手術咁傷身體, 最最擔心佢點過渡嘅問題啦; 至於眼仔睇唔到, 就希望佢多D練習, 多D嘗試, 我會比佢多D鼓勵!
感覺波波嘅左眼並未全廢, 如果我關上圍欄嘅門佢識停低, 唔會直撞過去盲得咁徹底, 希望保住呢少少感應, 幫助佢勇敢邁步殘而不廢!
以後要定期帶波波見醫生, 要mon住眼仔同用中藥幫蛋白尿嘅問題, 好感恩我仲有空間, 希望一切順利, 我會努力去幫個仔!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
