 |
| 相片連結 |
見完熊醫生後心情無咁差, 雖然波波眼仔已經睇唔到, 但醫生話目前情況唔係太壞, 唔需要摘眼, 咁都算我係如願以償啦; 呢個係我最後嘅願望, 卑微到祇求唔使麻醉手術就好喇!
經過咗一段時間比自己同波波習慣, 大家都比較適應個改變喇, 我叫自己相信波波係可以過渡到難關, 佢仲有嗅覺觸覺唔係絕慘; 而波波亦肯開始嘗試慢慢行, 開始同達達有番D互動, 無之前咁慘成日瞓覺; 不過胃口都係麻麻, 每餐都要加baby food做調味, 唔加兩羹落去D肉肉, 佢咩肉都無興趣食啊!
咁都無辦法, 為咗佢肯食都要照辦, 唯有減少肉嘅份量作蛋白質調較啦; 下次覆診要問吓醫生, 有咩中藥會令佢胃口開返!
之前我停咗達達嘅腦退化西藥, 諗住用草本試吓, 但無預期效果, 佢胃口變差返, 咁即係唔可以停西藥啦; 無論用邊種藥去幫, 大前題必定要佢哋舒服, 有胃口有精神咁生活, 既然已經試過停藥兩次都唔得, 我只好一直比西藥喇, 唯有一路加埋補肝藥護肝, 希望達達OK啦!
 |
| 見到兩隻豬等食就最開心啦😄 |
兩隻豬都11歲喇, 同年輕時分別好大, 健康管理要作出適量調較; 我會寬鬆D有底線咁滿足佢哋, 祇希望佢哋有生之年嘅每一日都過得開開心心, 舒舒服服, 反正我點做佢哋都唔會再陪多我10年喇!
唔敢講咩優質生活, 但起碼有正常質素嘅生活嘛!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
