琴日又帶波波見眼科熊醫生, 從波波整傷眼仔, 到琴日短短1星期, 已經見咗4次眼科, 但都未好返晒!
我已經極小心, 都避免唔到呢種意外, 唯一可以講句係因為我緊張, 第一時間book醫生, 可以免去創傷更大; 今日睇到FB, 有貓貓因為咁要摘去眼球, 真係抹一把冷汗啊!
醫生話一般角膜損傷其實一星期左右應該康復, 但感染到細菌情況變得嚴重, 如果治療進度唔理想, 傷口越來越深眼球穿洞, 就無可避免要摘眼球喇!
唉, 呢個仔總係有新鮮嘢, 從細到大係咁嚇我啦!
醫生話所以要每小時滴藥, 希望控制到, 而睇落今次傷口康復進展理想, 傷口有細到, 但仍未係完全好; 繼續滴藥, 改為每兩小時一次, 一星期後覆診, 但要自己小心監察, 有異樣即返去報到; 叮囑唔好除頭罩, 二度創傷更難彌補!
都算不幸中嘅大幸, 都不枉我兩晚通頂密密滴藥, 只可以嗑一嗑就算數!
可以想像波波戴住頭罩有幾慘, 叫佢著件衫佢都唔會郁祇係瞓覺, 戴住頭罩簡直唔識行, 加上今次眼仔仲睇唔到, 唉, 一個字講晒.....慘!
依家除咗食嘢我除頭罩, 其他時間我一定戴返, 不過個仔戴住就唔肯尿尿, 咁唯有除啦; 尿尿還可以預算, poo poo嘛, 3日無喇, 行得少, 無食菜, 唔知點攪😓!
照顧呢隻豬仔真係比較問題大, 想當日豆b病重都會配合住我, 真係好乖; 波波真係生骨大頭菜, 縱壞晒😖!
 |
| V V 完鬆一鬆頭罩 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
