天氣咁好, 但心情差到爆!
以為可以鬆一口氣, 好好照顧住波波嘅眼仔, 情況會漸趨穩定啦, 但竟然咁都遇到意外, 點解我咁黑㗎😭?!!
自從波波眼仔睇唔到, 佢每行一步我都睇到實, 就係怕佢會撞親, 但波波都好叻, 會好小心慢慢行, 亦無有過碰撞, 以為漸漸生活正常返喇, 點知會咁慘!
前晚瞓覺時一切都仲正常, 點知琴日早上就見波波單住左眼, 我個心即刻沉曬, 想保住一隻好少少嘅眼都咁難, 究竟發生乜事呀?
即刻book熊醫生, 插隊比個仔, 呢個時候再傷眼仔可以禍害好大!
真係福無重至, 醫生話波波眼有傷口, 仲有細菌感染, 頗嚴重啊!
佢完全無撞親, 應該係瞓覺時眼仔痕佢用手卒, 指甲刮親有細菌啦; 打針食藥仲要每小時滴一次眼藥, 我當然全晚無瞓; 只要係幫到, 我點會唔理佢去瞓!
不過未見波波有改善, 我一同佢滴藥就尖叫, 抱佢去尿尿都企唔穩, 應該痛澈入心!
見佢咁痛我好傷心, 好似比刀割開咗個心!
 |
| 真陰功痛到坐唔直企唔穩 |
本來醫生叫聽日覆診, 但我唔敢等, 今早等診所一開門即打去問, 我想帶波波見見醫生; 姑娘話今日當值唔係熊醫生, 我邊仲敢等, 就見郭醫生啦!
郭醫生真係檢查得好細心, 佢建議用血清, 話幫助會好大, 不過要波波肯抽血真係難; 醫生話盡量試試, 唔會將佢嚇親, 結果嘛...當然又係失敗!
唯有用藥啦, 再加多隻藥水藥膏, 仲要繼續食琴日熊醫生開比波波, 我最怕嘅止痛藥同抗生素, 睇嚟一定又會肝酵素高啦; 但無得揀, 一定要將病況settle down, 兩日後再覆診!
人好多時都真係好無奈, 我都無力再撐, 唯有順住條路行, 都無得再諗啱唔啱😵!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
