2017年11月11日星期六

虛無嘅希望

琴日帶咗波波見眼科熊醫生, 感覺唔錯, 有比時間我詳細講述波波眼仔情況, 亦瞭解我唔會選擇手術嘅無奈; 熊醫生有再三好仔細檢查波波嘅眼仔, 佢話波波右眼的確好差喇!

正如梁醫生所講, 波波眼球觸感唔正常, 好似一個漏咗氣嘅氣球一樣...
原因係白內障一旦成熟, 白內障嘅蛋白質會溶解液化而滲漏流出水晶體嘅囊袋外, 有9成以上嘅機率會發炎, 併發水晶體性葡萄膜炎就有機會要摘除眼球喇!
波波正係呢個狀況, 已經有發炎, 還幸未有其他併發症狀😞!

醫生話目前波波未係咁差, 試滴眼藥水控制啦, 希望佢接受良好, 咁就一世用眼藥, 佢話好多狗狗都係咁, 唔使咁擔心先啦!
我有比醫生睇我用緊嘅眼藥, 醫生話可以繼續用, 呢D唔算係藥只係保養, 在佢睇嚟效果唔大, 白內障除咗手術真係無其他辦法幫得上!
既然醫生話用都無妨, 我就當買個虛無嘅希望, 反正波波用咗眼仔無痕癢, 唔會卒眼都算有得著!

好心痛波波小小身軀要承受咁多病患, 從BB開始好似未停過有麻煩, 越諗心情越差, 又要開始不停帶佢做造訪獸醫院喇!
下星期三要見梁醫生, 波波已經開始咗用中藥, 要睇睇醫生為佢揀選嘅方案; 星期四見老師, 仍然希望倚仗另類療法去幫幫, 星期五就覆診雙眼, 香港九龍兩頭跑好繁忙😓!
覺得好攰, 唔止係身體疲累, 主要係精神好大負擔; 不過, 為咗個心肝我可以撐!