2017年11月15日星期三

配合中西藥

今日帶波波返去見梁醫生, 用咗一星期中藥後, 我無見到有不良反應, 假設佢受落; 中藥都係較溫和, 好壞都唔似西藥咁激進, 當然都無咁快見效果, 不過都有必要比醫生mon住, 因為要減西藥啊!

未減藥前 UPC ratio:0. 128

食中藥前做咗一次UPC, 當時我自己已經減咗西藥, 實在唔想佢攰到好似死咗; 診所比咗我尿檢report, 報告同未減藥前明顯高咗, 當然仍然喺正常範圍內, 結果都仲係好靚; 但個報告就顯示, 呢隻藥稍減份量, 已經明顯影響咗波波嘅蛋白尿比重囉!

減1/4藥量後, UPC ratio:0.146

梁醫生認為波波仲有好大空間去減西藥, 不過都係要循序漸進, 一邊加一邊減去配合中西藥份量, 到完全減免西藥後, 睇睇效果再決定新方案!

梁醫生比我更溫和, 我自己一減就係1/4藥量😜, 梁醫生就叫我每次減1/6, 都仲要慢慢分幾次去做, 較為妥當.
今次把脈, 睇脷仔, 摸脚板溫度都滿意, 探熱體溫都正常, 可以兩星期後再覆診, 再驗UPC, 睇睇再減藥後嘅report!

蛋白尿嘅問題暫時算係穩定, 呢方面我無咁擔心喇, 後日再覆診眼仔, 希望滴藥後情況都受控制!