兩隻豬仔胃口都唔太正常, 連波波都要手餵, 感覺好攰無氣力, 希望係天氣唔好導致, 因為咁啱阿女兩隻貓咪都唔肯食, 聽日要去見獸醫!
人同動物都一樣, 年紀越大健康情況越飄忽, 但都無得擔心, 每個生命都有一本專屬天書, 上天早已安排好, 都祇可以順天而行; 以前會相信人定勝天, 閱歷多咗, 堆積咗太多無可奈何與及無能為力, 依家不由得我不信命運!
Video:滴雞精
早前整過滴雞精比兩隻豬, 佢哋都超鍾意, 觀察所得似乎幫到波波豬, 之前發覺佢前手無力, 唔可以撐住坐直, 呢幾日似有啲好轉, 決定再做, 但波波有蛋白尿我都唔敢太放肆!
上次我自己親手做, 叫工人姐姐睇住做筆記, 之後由我再口述叫姐姐跟住做, 都做得好OK👍!
 |
| 之前見佢想用前手支持坐直都唔得, 好心罨 |
有人話腎病同血壓高唔適合飲滴雞精, 呢啲我都知, 我唔會大量比波波進補會視乎情形, 但飲適量我覺得有好處!
當然要睇自己毛孩情況, 自己要權衡輕重落每一個決定, 無一條特定程式, 我依家會對兩隻豬放任啲, 太嚴格規管對佢哋唔係好事; 生命有一定嘅長度, 佢哋已屬高齡, 現階段我最想見到係佢哋食得開心嘅表情!
 |
| 幸福唔係必然, 原來簡單咁挺腰坐直都要經過努力 |
波波年紀大喇, 健康情況極唔穩定, 亦已失去好多基本能力, 以前咁鍾意跑馬步, 依家連企都唔可以靠自己, 無咗視力見唔到最錫佢嘅媽媽, 估計好快應該連媽媽嘅聲音都聽唔到喇!
唉, 見到都幫唔到, 無能力將衰退叫停, 有種等時間嘅感應😢!
達達亦就快14歲, 個心仔又有事, 視力聽覺都逐步衰退, 所以好難有好心情, 不過刁蠻惡死係呢個女嘅本性!
還幸有個習慣佢仍未改, 定時定候會叫老公抱佢上梳化, 排排坐睇電視, 嗰時最好心情😉!
 |
| 呢張尿片果然幫到達達卸力, 無一路轉一路跌 |
幸好暫時兩隻豬對食仲有需求, 雖然要揀口味, 既然佢哋都鍾意飲雞精, 我就有限度盡量供應!
生命嘅長短無人可以預計到, 我希望佢哋仲可以生活得好, 而唔係祇為生存, 要放棄晒所有喜好!
針無兩頭利, 好多事都會顧此失彼, 我只希望日後無遺憾喺照顧佢哋呢段日子, 世上無生物可以長生不死, 心中有數盛放嘅鮮花已開到荼蘼!
 |
| 老BB好難服侍, 自己幾攰都會滿足佢, 抱住比佢安定 |
曾經以為老去係好遙遠嘅事, 時光荏苒, 突然驚覺波波達達已不再年青; 14歲等同人類84, 難怪兩隻豬仔都有老人脾氣咁難服侍, 每一日同佢哋相處, 對我都係一個新挑戰, 要因應需要設計照顧嘅方式!
照顧高齡BB, 實在有太多未知, 無得依賴經驗累積, 佢哋每一個都係獨立生命!
我每日都要將自己情緒調整, 即使佢哋嘅行為表現幾唔合理, 都要堅持忍住唔可以發脾氣; 我都係常人, 有時真係攰到好desperate, 但時時提醒自己, 到咗呢個年紀, 可能佢哋都控制唔到自己.....
到咗呢個階段, 我要更加珍惜每個好與壞嘅日子, 要好好掌握每一日共聚, 就當每日係唯一嘅一日, 令兩隻豬仔每日都生活得滿意!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
