陪咗波波一個通宵, 佢瞓得好好, 呼吸順暢, 偶然郁吓手腳, 我摸吓佢仲識轉身, 睇落好正常; 但我唔會有雨過天青嘅幻想, 諗起佢大叫全身軟晒時我好驚, 好驚佢辛苦我又唔知要點幫....
上次醫生做檢查無發覺佢身體有異常, 肝酵素微升喺呢個年齡段唔會做成太大影響, xray亦見到肝嘅size正常, 就focus喺佢氣管上, 因為見到明顯病徵較易落藥!
當然上次祇係做咗最基本嘅驗血同X光, 祇睇到好少部份嘅身體狀況, 要再深入瞭解, 當然要做更深入嘅檢查先適當; 不過波波太緊張, 即使做個超聲波佢都唔會合作, 要打鎮靜我唔想, 氣管收窄亦唔容許插喉落麻藥, 況且折騰一番對佢都唔會有大幫忙, 因為就算有唔好狀況我都唔會將佢劏, 假設去到最壞都祇會選擇寧養.
所以拒絕反來覆去做檢驗, 祇著重佢無痛苦就心安, 而最大原因, 目前我祇信任馮醫生, 但深入檢查要去大醫院, 我對其他獸醫無信心, 尤其是所謂嘅大醫生, 我之前遇過嘅都比我唔好印象!
波波目前嘅呢個生存空間有太多局限, 愛佢我會放手, 亦希望佢都可以放下, 唔好掛住媽媽再留戀呢個家, 瀟灑到彩虹橋上自由奔跑啦; 我希望佢有勇氣踏前一步, 唔好將受苦嘅時間延長, 肯將自己釋放!
知易行難, 事實波波同我都會互相牽掛, 放手祇係逼於無奈受制佢不良健康下!
週日嘅晚上好漫長, 我抱住個laptop坐喺佢身邊, 開始準備為佢做紀念視頻去揀相, 一路睇過去往昔佢矯健嘅丰姿, 對比身邊嘅乖仔, 實在感傷, 好留戀過去嘅美好時光!
週一嘅三餐, 蒸法國鵪鶉, 睇吓波波胃口如何, 早餐清碟食晒, 不過隔咗一陣就肚痾喇, 事實佢身體唔喺正常狀態; 午餐算正常進食, 但菜食唔晒, 近來都抗拒食菜, 之前試過要手餵啦; 晚餐已經唔肯進食, 要針筒force feed, 又再開始呢個惡性循環!
其實我熟知乖仔嘅性格, 琴晚同阿女傾談, 我已經話佢一定會撐, 既然佢未想離開我唯有配合佢嘅選擇.
不過感受呢種日子唔會太長, 珍惜餘下嘅寶貴光陰啦!
 |
| 波波最愛乾淨, 今早換過床鋪被仔舒服晒 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
