 |
| 波波好自豪年輕時有靚靚嘅毛毛 |
今日波波情況更差, 用針筒餵都唔太肯食, 我已經停晒所有藥物, 唔想再強迫, 唯一keep住滴順勢療劑- transition ease; 陪住喺佢身邊, 流咗眼淚千公升, 心情一緊張, 個肚又唔爭氣, 肚痾咗N次....
點解我總係唔可以將心情調整?
望住佢肚仔起伏, 知道佢未離開, 個心稍淡定, 但相對又好怕佢咁撐會受苦, 感覺五味雜陳講唔清, 喺呢個最後嘅階段, 我仲可以點做令佢走得平靜?
諗起喺豆b將要走時, 曾經請好朋友同佢傳心, Ka波波都認識, 應該都會肯同好朋友傾一傾; 我需要一個橋樑去問吓個仔, 仲有無未完心願? 有無嘢要媽媽聆聽?
多謝好朋友幫忙, 亦多謝乖仔肯溝通, 令我飄浮中嘅思緒可以安定; 或者有人會覺得動物傳心好神化, 但經過豆b咁清晰嘅表達, 我相信宇宙間總有某種腦電波可以對上, 可以傳達訊息; 以下係好朋友為波波傳遞比我嘅訊息, 我果然係無解讀錯呢隻豬仔嘅固執, 到呢個時候寧願受苦都仲咁冥頑不靈!
後記： 波波清楚傳達咗佢訊息後, 知道佢要陪我到最後, 我同佢講, 咁要食嘢先可以留低, 晚餐時間, 我抱住佢遞個碟埋去, 佢竟然自己食咗1/3樽baby food...
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
