 |
| those were the day |
感覺波波應該捱唔耐喇, 通宵陪喺佢身邊, 叫佢唔好撐, 乖乖去搵豆b玩!
一路講一路把聲震晒, 叫自己唔好喺波波面前喊, 佢知我咁傷心一定會為我硬撐; 但我真係唔想見到佢再大聲叫喊, 雖然唔知佢發生乜事, 但一定係辛苦先會咁嗌!
星期日工人姐姐放假, 我自己搞掂兩隻豬3餐, 佢哋真係好乖, 星期日一定唔使我手餵, 會自己食晒; 一整日都正正常常, 食飽飽就瞓覺, 到咗夜晚飲湯時間, 波波無飲晒, 心諗可能鱷魚肉湯飲厭喇, 聽日再買乳鴿啦!
然後突然大嗌, 我當時仲抱住佢喺懷中, 感覺佢突然軟晒, 隔咗一陣就開始大聲嗌....
我當時感覺佢要走喇, 即刻拎順勢療劑transition ease幫佢滴, 再叫阿女做reiki, 佢靜止返....
呢種刻骨嘅情境, 我印象太深刻, 一世都唔會忘懷, 做媽媽嘅點會感應唔到係差不多時間😭!
記得豆b過生日後一個多月就走, 其實比我陰影好大, 加上最近波波情況真係唔好, 我真係好怕....
拖住波波嘅手仔同佢講, 乖仔唔使怕, 家姐會接你一齊玩, 好好過日子等媽媽, 你暫時去一個更好嘅地方渡假, 我哋會再見㗎!
有人咁講, 喺呢個世界嘅分別就係另一個世界嘅團圓, 死亡都唔係咁可怕, 你祇係暫時見唔到媽媽, 但你靈魂可以返來探媽媽嘛!
不過呢個仔好固執, 要佢妥協好難, 以前洗牙落麻藥都唔肯瞓, 係都要死撐, 醫生話佢氣麻都要用多正常嘅一倍時間, 佢意志力係超班!
今晚陪住佢身邊, 見佢有郁動就抱吓, 要再錫佢面仔怕無好多時間...
好多人都睇過[千與千尋]裡面嘅說話：
"人生就是一列開往墳墓的列車, 路途上會有很多站, 很難有人可以自始至終陪著走完.
當陪你的人要下車時, 即使不捨也該心存感激, 然後揮手道別."
我清楚、明白、瞭解, 但我只係一個普通人,要怨嘅都係會怨, 要鬧嘅都係會鬧, 要喊時都係會喊啊, 畢竟心裡嘅難受唔係道理就能夠釋懷!
但今晚, 陪住喺波波身邊忍住唔敢喊, 但淚流滿面喉封晒, 點解要我同分別抗爭, 受傷、失落、失去, 人生要經歷咁多試煉? 就係要咁慘嗎???
窗外正行雷閃電又落大雨, 係個天代我喊?!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
