加深記憶

一年前嘅波波豬

 
預較喺手機嘅鬧鐘每日仍routine咁響, 提醒我要比波波食藥, 雖然一切已經改變, 波波再唔喺我身邊, 但我唔想將鬧鐘set停; 老公叫我停機好好休息, 但我就係唔想, 每次鬧鐘響我就回想, 回憶當日餵藥嘅情境, 一次又一次喺腦中重複, 加深記憶....

 
抱住波波嘅紅外線氈, 稍感安慰, 雖然呢一切睇落好自虐, 但情感發洩有一個管道出口, 總勝過悲傷如山洪爆發, 河流決堤吧, 我會將情緒慢慢, 慢慢修正, 但唔想強迫!

抱住波波常用嘅氈稍感安慰

有啲事, 真係唔可以話放開就放開咁容易, 理智嘅想法當然係當斷得斷, 人生要向前看先係最好嘅生活方式, 如果你覺得呢一切祇係自我沉醉於悲傷, 係自己唔願意走出嚟, 咁祇係你生活得太幸福, 未曾經歷過傷痛, 決少咗共情能力!
置身事外, 邊個都可以心平氣和, 身處其中, 又有幾多人可以淡定從容去面對一切?

記得睇過一篇文章, 佢話死亡會面臨三次, 第一次係呼吸停止, 第二次係喪禮火化, 第三次係當世界上每一個人都已將你徹底忘記! 

聽日, 波波火化喇, 佢會面對第二次嘅死亡, 但只要我無忘記, 波波就一直活著, 活喺另一個平衡空間, 永遠活喺媽媽嘅心裡!

好認同以下嘅解讀, "我哋無法阻擋時間嘅流逝,我哋亦必將與家人與愛人生死相隔, 但我哋要記住, 死並唔係生嘅對立面, 而係作為生嘅一部分永遠存在, 人類嘅記憶 , 就係對靈魂嘅延續!"
 

最親愛嘅波波, 雖然我肉眼已經再見唔到你, 但你已喺媽媽嘅心劃下一道深深嘅痕迹, 媽媽要將我哋一齊相處嘅美好回憶, 植入流年嘅夢裡!

 

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！