今日, 終於要同波波講再見, 為乖仔唔使再受苦舒一口氣, 但自己心痛超難受, 到咗真係要分別嘅時候, 我真係唔捨得放手....
琴晚好朋友再比我訊息, 話見到道門已開有幾隻松松嚟接佢, 時間係差不多了, 但波波極堅持要留到最後; 朋友叫我唔好全程守住, 順佢意思, 話波波愛我太深, 未必想我睇住佢停止呼吸😭!
愛佢當然順佢意, 亦唔想佢再為我撐住, 我背住佢坐, 祗keep 住同佢滴gentle passing - transition ease; 第3個無眠夜, 好奇怪呢刻已經再無睡意, 可能已比心痛掩蓋住!
一整夜間歇性佢會吠幾聲, 還好無尖叫無好痛苦仍瞓得好平靜!
到咗今日下午, 波波終於要走了, 我親自為佢洗乾淨面仔, 全身用酵素清潔好, 再吹好毛毛, 媽媽為乖仔梳理好等波波乾乾淨淨好好上路!
呢段日子以來, 感覺好辛苦, 每日心口都好似壓住一塊巨石, 每次呼吸都感覺劇痛, 精神肉體都折磨到極至, 然後到咗今日, 要送別我嘅心頭肉, 所有氣力一吓子掏空....
阿女話養呢隻豬, 見我從未有過嘅辛苦, 從細細個開始, 祇享受過好短暫嘅幸福, 但我覺得有佢陪伴日子好美好, 反而乖仔受嘅苦比其他狗狗為多, 所以相對地佢得到我更多憐愛同關顧!
呢段最後嘅日子, 阿女每日為佢做多次reiki, 希望佢呢段路程行得順利, 不過今早reiki時, 阿女話都feel到同以前唔同感覺, 佢已經唔吸能量好似會滑走, 預感好快要別離!
而我, 撫摸住佢躁動不安嘅身體不停安慰, 已經茫無頭緒仲可以再為佢做乜嘢事, 祇可以喺佢耳邊輕聲道謝、道愛、道歉、道別, 媽媽祇可以陪伴到此, 以後無咗我嘅日子, 要好好照顧好自己!
 |
| 記住呢個永遠係你嘅家, 你多啲返來探媽媽 |
徐志摩講過:"一生至少該有一次, 為了某個人而忘了自己", 我諗大概就係呢種感覺吧, 送走波波, 感覺自己都唔存在, 四週比黑暗同死寂團團圍住, 痛失最愛嗰種難受, 非文字能夠形容....
打從佢開始脾氣暴躁, 我已經心裡有數, 佢正面向死亡邁步, 每日望住佢急速衰退嘅健康而心痛, 內心波濤洶湧, 整個人被悲傷嘅情緒操縱, 眼淚隨住每一個好朋友嘅問候觸動!
 |
| mp4-Please don't go |
當我感受到我哋相處時日無多, 就做咗呢個相片記錄, 同大家一齊懷念我最愛鍚嘅波波!
好多謝乖仔曾經來過, 比咗我陪伴同愛, 與及一段最美好, 最快樂嘅時光!
波波豬, 萬般不捨, 都祇能放開你手仔要你先行一步, 但媽媽嘅愛會伴隨你到天涯海角每段路!
 |
| Link:傳心 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
