 |
| 氣場好弱嘅波波豬, 好可憐 |
波波整體狀態都唔好, 雖然無明顯見到佢有重病嘅徵兆, 但見到正下滑嘅健康指標....
佢食量暫時無減少, 但唔吸收體重一直跌, 精神體力都一直向下調, 當然偶有好轉, 但如曇花一現!
每日見佢情況時好時壞, 呢種來回地獄又折返人間嘅經歷, 我體驗唔少！
 |
| 呢個精神狀態如曇花一現 |
朋友問我會否考慮用中藥方, 我今次完全無糾結, 波波體質極敏感, 上次試用蘇子湯, 已經係好安全, 但佢受唔到不停尿尿, 我唔敢喺佢咁弱嘅氣息下做試驗; 我今次做法有改變, 如果佢仲有戰鬥力, 我會陪住佢作戰, 如果佢覺得攰我會順其自然, 大前題當然要佢無感覺辛苦, 最希望佢最後一程會喺夢中走完!
睇落我今次抱住消極嘅打算, 其實我經歷咗無數嘅失眠,何去何從不斷喺腦中盤旋!
 |
| 最叻仔可以呆呆坐一陣, 佢往後餘生就祇可以咁? |
過去嘅我應該急到癲, 拼命去諗辦法會求求上天, 今次仲要係我最難割捨嘅波波豬, 我只要稍為諗吓無咗佢嘅日子, 個心都會裂...
但當我見到佢每日祇係無氣無力咁瞓覺, 睇唔到聽唔到行唔到, 連撐起身都有困難時, 我問自己我要唔要咁生存?
佢唔可以再跑跑跳跳, 失去咗狗狗最開心嘅時段, 甚至唔可以維持生活上基本嘅需要!
久延殘喘有意義嗎?
佢會甘心咁落去嗎?
一直強調起碼嘅生活質素仲有嗎?
見佢脾氣咁差, 都知佢有口難言, 心情唔好要發洩; 超心痛, 呢個係養毛孩最難走過嘅階段!
 |
| 大部份時間都係瞓, 除咗3餐同餵藥將佢叫醒, 就係抱住佢等佢安眠 |
喺呢近半年, 波波衰老得好快, 明明健康一直都保持得幾好, 一下間風雲驟變, 幾個月前突然病發嘅氣管收窄, 雪上加霜, 心肺無事、驗血唔太差咁又點? 喺呢個年紀, 器官衰退大病後唔易復元, 畢竟曾經歷過命懸一線!
有人話落坡係慢慢咁行, 但我感覺係坐住滑梯咁衝住跌, 一瞬間去到底無得停歇!
 |
| 大字咁手張開無晒力 |
記得當日豆b比過我呢種將要別離嘅感覺, 都祇係陪多咗我幾個月, 今次波波可以支持到幾耐? 佢會唔會好叻仔復原? 我好矛盾唔知想個結果係點....
越愛越唔想佢受苦, 但又唔捨得佢離開我身邊!
如果問我有無心理準備, 乖仔日子將要走完, 要做好心理建設, 呢種心理準備有用嗎? 可以傷心較少?
當日豆b嘅最後階段, 我睇咗好多書, 以為會接受得釋然, 結果都係做唔到瀟灑道別!mp4-慢慢喜歡你
喺呢個階段, 我會滿足波波所有需要, 佢想食嘅唔會缺少, 亦會比佢適量食補, 溫和比佢補身較安全; 今日燉咗淮山杞子乳鴿湯, 見佢飲到舔舔脷, 我決定比佢鍾意嘅係最重要!
波波仍然好黐身, 時刻要媽媽抱住, 我肩背手臂又痛又酸軟, 但都堅持比佢喺我懷中感覺我嘅心跳!
同意生命不在乎長短, 如果真係要離別, 我祇求無痛苦走得適然, 乖仔會有愛伴隨到最後一分一秒!
 |
| 深夜陪喺波波身邊, 感慨萬千 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
