波波氣息已經好弱, 整個上午都係昏睡狀態, 我唔敢再比佢任何食物, 曾睇過一篇報導, 話身體進入彌留狀態, 再比食物係加重佢嘅負擔, 佢會好辛苦, 所以今早祇比一茶羹baby food佢都嘔; 但佢未肯走, 眼巴巴睇住佢餓死嗎? 既然佢話鍾意湯嘅香味, 又試比一茶羹滴雞精放近佢鼻仔比佢聞, 但波波立時伸出脷仔, 好快舔晒！
一路留意住佢有無嘔, 無異常, 過兩個鐘後我又再比少少, 比佢濕吓個口, 佢都好快舔晒; 無嘔又肯舔應該唔會辛苦吧, 咁比少少, 少少佢潤吓, 個心無咁難受!
除咗舔滴雞精佢會張開眼, 基本上都係無意識咁瞓, 一隻超小型犬無食物到肚可以點撐? 佢氣息咁微弱我感覺係差不多時間!
然後好朋友whatsapp我, 話波波覺得自己都差不多時間, 叫我做好準備佢要走....
收到呢個訊息極難受, 還幸乖仔好平靜咁瞓, 無痛苦掙扎我較安心!
叫工人姐姐同波波道別, 佢大喊話好難受, 佢一喊我嘅自制完全崩潰, 衝入廁所喊到一發不可收拾....
當日豆b走時無見佢咁傷心, 可能相處唔係太長久, 但波波見足5年幾, 又一齊出外影相一齊鬥快走, 相處同一屋簷下咁長時間, 感觸曾經有過嘅歡樂時光, 難過都係正常感受, 畢竟人係感情動物!
當日豆b同朋友講話準備要走, 都停留咗大半日, 到第二日早晨先走, 波波咁固執, 應該要更長時候吧!
但今晚我見到波波做出同豆b一樣嘅動靜, 就係大聲吠眼望住四周....
當日豆b比我嘅感覺好似有天使來帶佢走, 但佢仲想逗留, 好似同人argue表情好嬲; 今晚波波嘅表現如出一轍, 一整日好似昏迷嘅波波突然好精神, 令我有迷一樣嘅感受....
還是狗狗都有迴光返照? 咁佢明早真係會走??
抱住波波在手, 好希望佢喺我懷抱走, 咁相愛嘅我哋有咁深嘅緣份, 可以抱住佢走就再無遺憾!
已經兩晚通宵陪伴, 眼澀又好眼瞓, 好怕今晚捱唔住陪唔到乖仔走, 要狂灌咖啡希望唔好冧, 可以守到最後一刻!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
