 |
| welcome home, 我嘅9月小天使 |
今日帶波波返屋企喇, 唔識形容係乜嘢心情, 由早上開始, 心口有巨塊頂住, 頂到喉嚨椗....
琴晚好大雨, 出紅雨警示, 好擔心今日又落大雨, 雖然無大妨礙, 但又要出去買花濕晒身就壞心情; 感恩一覺醒來天氣出奇地好, 係波波你幫媽媽嗎?
匆匆出去買花, 返來就開始焗蛋糕, 雖然波波最後階段已經對蛋糕無興趣, 但我記得之前佢係會搶住食, 依家乖仔回復身體健康, 一定好好胃口, 媽媽一定要為乖仔做愛心蛋糕啦!
下午到達善終公司, 再見到我親愛嘅波波難忍淚如雨下, 我記得除咗送別叻叻時我有傷心落淚, 其他我都可以忍住唔喺佢哋面前喊, 但佢係我最心愛嘅波波, 我實在忍唔到, 仲要喊得好慘, 唉, 真失敗!
不過波波喺我哋心目中地位真係唔同, 除咗我極傷心, 阿女都忍唔住喊, 連老公都靜靜抹眼淚, 畢竟呢隻豬係手掌咁大辛辛苦苦湊大, 呢14年間有幾多難忘經歷, 數都數唔晒!
整個火化過程同過往一樣, 我都一樣堅持唔離開, 要等待佢嘅骸骨做最後檢查, 然後磨好灰就一齊返家！
咁多日來心掛掛, 今日同波波返家後一切安定落嚟, 望住佢嘅骨灰盅好失落, 腦中浮現嘅係活蹦活跳嘅波波, 一下子變成灰燼好難過啊!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
