波波, 每一日都想你, 等你返嚟!
熟識嘅房間熟識嘅環境, 只係無咗你喺身邊, 一切變得冷清清; 整個人變得懶慵慵做乜都提唔起勁, 就祇想翻出你嘅相片, 無無聊聊咁左整右整, 一邊流淚但感覺內心又好平靜, 因為見到相中嘅你, 腦中立即出現你生動嘅立體形象互相呼應, 我立刻閉上眼睛!
見到你開心跑馬步, 一跳一跳有節奏咁跑唔停!
中午, 阿女帶貓貓來沖涼, 貓貓好享受浸milky spa, 回想你自從失明, 一落水會好驚, 對微泡浴再無享受嘅表情了; 唉, 生活上仼何細節都會聯想到你身上, 你係媽媽無處不在嘅小精靈!
 |
| 貓貓上床休息,波波一直都默許 |
然後貓咪沖完涼, 同往常一樣, 會上大床稍作休息, 見佢初時好relax半瞇上眼睛, 突然間跳起縮咗去枕頭後面藏匿....
我第一時間就想起你, 係咪你返咗嚟屋企? 只係我無見到, 而貓咪有特別感應, 你形象會反映去到佢嘅眼晴?
 |
| 以往貓咪都會上大床休息, 同你傾吓偈 |
我好開心, 即使我見唔到你, 但你無食言有守承諾, 有返來睇媽媽, 或者你唔想媽媽見到你會傷心, 有咁貼心嘅乖仔媽媽好高與!
或者, 你仍需要時間適應, 過渡進入另一段旅程, 所以你會流連喺屋企, 因為呢度有太深厚嘅感情; 但你要勇敢踏前好好凖備, 唔使再掛念媽媽, 今日之後, 媽媽答應一定會盡快調整好心情!
我哋祇係暫時分開一段短日子, 時間係過得好快, 好快就到重逢嘅一日, 到時你記得嚟相認, 你知媽媽係路痴, 極需要你來接應㗎!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
