今日再同大家分享達達嘅脫毛症, 好長篇 :)
經過咗無數挫折、失敗、今日見到有少少成績喇, 終於見到達達豬之前光禿禿嘅皮膚, 生出少少好幼細嘅新毛毛;感覺好似以前換緊BB毛咁, 一路褪下嗰D唔健康嘅毛髮, 換上咗新毛, 我諗要換好晒去到正常嘅狀態, 仲有一條遙遠嘅路, 進展緩慢但總算每日都有進步啦!
回想過去嘅一段日子, 真係滿途荊棘, 我由滿腔希望, 充滿鬪志去開始幫達達; 但用盡咁多不同嘅辦法, 不同組合嘅補充品, 都係鎩羽而歸。
每日努力上網揾料, set住時間表跟住去做, 去街唔敢去得耐, 怕延誤咗療程; 日復日得到嘅都係負面反應, 我嘅雄心壯志都磨蝕一清; 當見到達達禿嘅範圍越嚟越嚴重, 皮膚轉黑甚至身上伴隨住一種發霉嘅氣味, 我嘅信心完全崩潰; 望住達達真係欲哭無淚, 三番四次接近想放棄!
曾經話自己有頑強嘅鬪志, 亦講過永不放棄, 原來自己都不個係一個普通人，接受唔到再三打擊 :'(
多謝各位好朋友鼓勵, 一直叫我唔好心急唔好放棄, 慢慢嚟!
於是耗盡心力, 再一頭裁落去!
 |
| 無諗過公開呢D相架,破壞印像 :) 但依家有好轉, 大家可以睇到有個比較 |
 |
| 今年1月中情況最壞,毛髮好旱無晒生命仲伴隨發霉氣味 |
 |
| 毛髮甩到見肉,皮膚又紅又黑:( |
我以前並唔認識"脫毛症", 即使當年叻叻甩光晒毛, 當時嘅醫生從來無同我談論過呢個症狀; 雖然我都不明所以, 點解叻叻會甩光毛毛, 但都以為係個別事件, 以為係佢有病食藥引起嘅副作用, 所以從無當過係一個獨立嘅症狀去處理!
http://yippompom.blogspot.hk/2011/07/blog-post_8645.html#more
 |
| 2010年10月發覺佢尾根甩毛,但唔嚴重! |
2010年, 喺松網見到另一隻狗狗, 甩毛情況同叻叻一模一樣, 當時達達剛開始尾根有甩毛情況, 我哋喺網上討論, 亦各自帶狗狗去求診; 當時達達徵狀輕微到連H醫生都無諗佢會係脫毛症; 係我堅持要同達達驗血, 結果確診甲低; 我希望病向淺中醫, 唔好再一次發展到同叻叻一樣, 當時都以為控制好甲狀腺病, 達達就會停止甩毛!係呢個網友, 令我認識脫毛症; 因為佢狗狗症狀明顯, 佢嘅獸醫有同佢提及alopecia X! 但好不幸佢於去年意外已過身, 唔知佢狗狗依家情況點呢!
當日我知道有咁嘅一種禿毛症, 開始上網搵料, 越知得多就越驚, 好擔心我又再碰到相同嘅事, 及後達達情況變差, 我同H醫生商討用melatonin, 多謝H醫生開放嘅態度, 認為不防一試, 慶幸達達生番豐厚嘅毛毛!
 |
| 2011年服用melatonin曾經有過好成績 |
但我知道係乜嘢一回事, 我實在讀過太多資料, 對呢個症狀已經太熟識; 我知道達達生番毛毛, 呢個現像唔會永久, 噩夢會重臨, 只係我拒絶接受⋯
 |
| 2011年8月, 生番晒澎澎毛毛! |
達達從新長毛嘅period好短暫, 不足一年, 噩夢重臨; 我預期今次唔會再咁好運, 達達豬將會續漸掉光佢嘅毛毛!
 |
| 同年10月, 毛髮變質仲黑色, 我知我又將要迎戰喇! |
無疑呢個係一個症狀唔係一個病, 但每日要睇住佢毛毛越嚟越少, 畢竟好難接受到; 呢段日子以來, 好似進入歇斯底里嘅狀態; 網上見到有狗狗用乜嘢得以康復, 都會跟住去做, 講服自已要相信有奇蹟降臨!
我有我一次又一次碰璧，一次又一次失望，達達就繼續落毛!
呢段日子以來, 好多謝各位好朋友, 好網友! 即使我哋素味謀面, 都唔吝嗇比我鼓勵支持, 幫我揾料揾方法, 要特別多謝V佢不斷幫我揾有關資料, 幫我從外國訂貨, 甚至將我加入Black Skin Disease in Pomeranians呢個群組, 等我可以分享到各國嘅朋友, 幫佢哋患有BSD嘅松松所有成功嘅案例療程, 今日達達嘅進步, V對我幫助唔少.
V! 多謝你!!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
