 |
| 相片連結 |
今日又同3隻豬去街街, 其實好怕呢D天氣, 潮潮濕濕咁, 惹到牛蜱就死; 我都已經唔比佢哋行草地, 見到人家狗狗喺草地上跑到飛起, 我真係羨慕到死, 但我真係無勇氣!
有人話避得幾多, 牛蜱唔係只生存於草地, 根本行到邊度都有機會惹到, 真係好煩; 但草地始終係高危地帶, 避得幾多得幾多啦, 我都知咁係好逃避, 但唔去草地損失都唔係咁大嗟, 只要帶佢哋出去行行跑跑, 見吓外面嘅世界, 佢哋一樣咁開心啦!
喺松網見到有松松Luke Luke年初四走咗喇, 先得4歲, 係中咗牛蜱毒; 最慘牛蜱係無得預防, 所謂預防都係選擇滴頸, 再加噴劑; 但呢一切都只會毒死隻蜱, 如果因為自己落咗藥就大安旨意, 無好好檢查狗狗毛髮身體, 咁仲死! 比牛蜱咬咗又唔及時移走隻蜱都會傳到毒素, 好大可能中招!
要知道要醫牛蜱熱要用好高劑量類固醇, 好傷器官架, 仲要未必醫得好, 又會潛服, 真係好得人驚!
雖然牛蜱係咁可怕, 但我從來無同我嘅豬仔用呢D滴頸藥, 亦從無噴過FL; 我唔想未見其利先見其害, 日復日年復年咁加D毒藥入佢哋嘅皮膚身體, 諗都諗到有幾傷!
我一直都只係用D天然草本同佢哋噴上, 唔會對佢哋有傷害; 每次去完街我亦唔會偷懶, 會地氈式將佢哋毛髮搜查; 好耐以前我都試過喺豆b身上見過有兩隻牛蜱爬爬吓, 慶幸應該未咬, 因為無吸血變大, 亦慶幸我有小心檢查, 豆b幸免於難; 但我都擔心咗好一段時間!
要講呢D真係講極都講唔晒, 好多時都聽到主人話有滴頸有噴FL, 但都中招, 咁就証明做咗都唔係萬無一失架, 不如靠自己小心檢查啦, 起碼唔使狗狗嘅血入咁多毒素嘛!
呢個係我個人做法, 每個人都有不同選擇去照顧你嘅毛小孩; 當然一般醫生都叫要滴頸要噴FL :)
下面係我copy自松網嘅post, 相信Luke Luke主人唔會介意同大家分享, 比大家一個提示!
又係牛蜱！一年前中咗牛蜱！當時發現佢牙肉已白，嘔吐，之後我地即刻帶佢去睇醫生，驗血。正常狗仔血大約 34，Luke Luke 得返16！當時醫生話佢好危險要求留低觀察，第二日收到通知，得返14，需要輸血保命，隨即轉介去旺角太x道診所輸血！留醫一星期叫做穩定並可出院！但牛蜱好毒，一直潛伏，過程中一路都要食類固醇，並且依時覆診，隔咗2個月之後又再返發！再次入醫院輸血！當時病情反反覆覆！而我地每日都要依時比類固醇控制 病情，佢好叻仔！一路打依場仗！直至昨日病情又轉差，於昨晚半夜離開了，去了彩虹橋！
Luke Luke 需然細個就走，但我知道佢無憾了！佢依㡬年走遍全港各區，彭福公園，西貢，山頂！上山下海坐船去離島！亦可品嚐各式美食！相信佢在彩虹橋可以同朋友仔分享佢依次旅程！
PS 順帶一提，一定要小心牛蜱，盡量小去草叢！我當時已做咗防護措施,frontline 等，但後來先知道佢只係可以防止牛蜱繁殖，唔可以防牛蜱咬佢地，當牛蜱咬咗佢地，就會病毒輸入佢身上，而身體上白血球以為被攻擊所以反撃攻打自己紅血球， 破壞免疫系統而做成貧血（類似血癌），所以盡可能少去草地!
