年初三, 外面好熱鬧, 喺度舞獅!
幾隻豬聽到咁大聲"茶篤撐", 瘋狂咁吠起上嚟, 唔使諗我都唔會同佢哋出去!
雖然係假期, 但明顯街上都好多人, 行嚟行去, 到處都有新春拜年嘅人仕, 小朋友比平日多咗, 我更加唔敢同佢哋出去, 唔想波波見到小朋友又狂吠, 費事比人眼厲厲啦, 更唔想嚇親達達豬!
年尾我真係好忙, 都覺得好勞累, 呢幾日新年假嘅意義, 對我嚟講就係好好休息; 因為有好多不同味度嘅年糕, 都要快D食咗佢, 所以都係配合簡單嘅蔬菜就ok; 教咗工人姐姐點煎糕, 呢幾日可以透吓氣喇!
琴晚阿女買咗個蛇仔winnie比佢哋, 3隻豬反應各有不同, 又嚟講吓佢哋性格!
達達豬從來都唔鍾意玩具, 你放低喺佢隔離都ok, 有興趣時就玩一吓; 達達番嚟我度時都歲幾喇, 佢應該之前都好少玩具, 所以佢從來對玩具都唔感興趣; 可能佢嚟咗我度, 有波波陪伴係佢最開心嘅日子,所以佢緊張波波多過玩具!
豆b初嚟我度都唔會玩, 依家就變得頗熱衷, 不過佢對新嘅公仔都有D恐懼, 要放低好耐佢先敢行埋去; 豆b自細都自由慣, 一日通屋跑, 又有大狗細狗同佢玩,玩具對佢嚟講係唔重要, 佢跑來跑去都夠佢玩一餐; 所以開始時對玩具有無從入手嘅感覺,但佢至愛都係食, 唔係玩!
波波係咁多個裏面對玩具反應較正常嘅小朋友, 有新就唔愛舊果D啦! 波波bb就跟我, 又細個多病, 比我縱到好似小霸皇, 玩具對佢垂手可得, 佢唔會珍惜兼貪新忘舊; 又知我對佢疼錫, 性格就變到順我者就ok , 因為達達識就住佢, 所以佢同達達最夾!
原來狗狗同細路仔都一樣, 細個生活環境對佢哋成長好大影嚮!
波波自細我過份保護, 做成佢小霸皇性格, 到依家糾正好難 :( 同佢去街最慘,要避開其他狗狗同小朋友, 唔係就狂吠一餐!
達達細時唔知發生過咩事, 做成性格好緊張, 乜都驚一餐, 同佢去街就要好alert, 唔可以嚇親佢, 唔係佢就唔敢行!
豆b習慣通處跑, 見慣大狗細狗, 生性豪邁! 同豆b去街最relax, 佢唔會驚又唔會吠, 本來性格係最可愛, 但最唔好就係習慣乜都要爭, 所以兩姐弟有時會打交 ;(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
