 |
| 個心都跟住個公仔碎埋 :( |
年近歲晚換工人姐姐真係慘, 仲要換個乜都唔識, 一日到晚MAM到我暈, 無錯我有話唔明要問, 但無諗過係咁!
琴日同3隻豬去完街,番去用毛巾同佢哋抹腳仔, 跟住放低咗條毛巾帶佢哋去飲水啦; 姐姐拎住條毛巾問我要放番邊處, 見到條毛巾一噠噠黑色, 梗係拎去洗啦, 咁都要問, 我就快C得!
從無請過工人好似呢個咁, 要我由朝做到晚 :'(
真係做咗咁耐人都未試過做咁多嘢, 有D懷疑佢係咪真係唔識, 就可以企喺度只係問,問.問; 但做嗰個係我囉!
同阿女商量過, 既然姐姐咁緊張錢嘅問題, 就試同佢傾吓啦!
我同佢講, 叫佢比心機做, 教咗嘅要記住, 我哋隔一段時間會做個檢討, 做得好會有bonus!
琴晚食完晚飯我番入房上網, 無耐佢同我say goodnight, 跟住我入廚房想倒杯水飲, 嘩! 真係嚇咗一驚!
個廚房乾淨到好似示範單位, 一塵不染; 抽油煙機塊玻璃立立令, 反晒光; 連個鑊底都省到好乾淨, 試吓用手摸吓其他用具, 都好乾爽! 佢今次反而無叫我去睇佢做得有幾乾淨, 係想我自己發現啦!
原來財真係可以通神, 我係咁講一講, 就有咁大分別; 老實講佢如果可以keep住咁做, 我哋唔介意比多少少出嚟, 仲勝過買人參補氣！
當然做得好要稱讚, 我無忘記同佢講well done, 都知道稱讚比責難更具效果, 狗狗都用友善訓練啦! 咁大家都happy, 何樂而不為, 叫佢繼續努力!
今朝一早起身, 竟嚟二度驚嚇, 但今次係負面!
姐姐比我讚壞咗喇, 佢竟然打爛我心愛嘅瓷器公仔, 望住碎開咗嘅公仔, 我個心四分五裂, 心痛到有口難言!
我請過咁多工人, 都一定同佢哋講, 呢D公仔唔好同我清潔, 我會自己攪掂! 都知道要確保安全, 要自己動手方為上算; 但工人姐姐急於表現, 今早佢竟然發起癲, 話想同我從新排列 :(
呢D公仔我儲咗好多年, 由阿女幾歲開始學芭蕾舞, 每隔幾年呢間公司會生產一款, 我續一收集; 但芭蕾舞系列已經停產, 有錢都買唔番! 呢D公仔對我意義好大, 我一向都珍而重之!
望住碎開嘅公仔, 欲哭無淚, 不發一言; 拎咗番入房哀悼一遍！
我真係好心痛, 痛到標晒冷汗, 嘗試安慰自己, 算啦!
世間上我最親愛嘅人, 最親愛嘅狗狗, 我都唔可以保住佢陪伴我一生一世, 永不分離, 何況係一件物件!
雖然呢件物件載住回憶無數, 但除咗放下, 我可以點 :'(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
