踏入大年初一, 先同大家拜年, 乜都唔講, 最緊要都一定同大家講句，恭祝大家身體健康!
今晚又比波波嚇到我好似癲婆, 事緣我哋一家食晚飯時候, 阿女見到波波好似好攰, 問我佢有無唔妥; 我本來都無覺有咩特別, 每晚我食飯佢都係番床仔瞓住等我; 但當我食完飯就發覺有問題, 平時我一放低飯碗, 佢會立刻跑過嚟要我抱抱, 今晚我叫佢都唔郁!
咁我開始擔心, 即刻同佢探熱, 體溫係39.5, 我PM咗Hsiang醫生, 問咁算唔算發燒, 佢話係有燒!
仔阿仔, 大除夕晚邊仲有醫生睇呀, 新年流流點解要同我咁玩!
問Hsiang醫生會唔會應診, 佢話今晚好難, 問過老闆應診費好貴, 但主要係都要搵到助手肯番.......
叫我去試麥X臣或者太X道!
老實講麥X臣我一定唔會再去, 波波細個肝有問題, 有睇過呢處, 佢哋比佢食藥AST越食越高, 由最初90U/L去到384U/L, 再加藥仲去到875U/L, 正常係0-50U/L,我怕怕喇!
另外我過咗世嘅樂樂女, 都試過深夜發燒40度, 又去呢度睇, 佢講一大堆嘢, 都係叫我做化驗, 一大堆不相關嘅化驗都係錢嗟, 如果有必要, 做係無問題, 但都要有呢方面病徵懷疑先做嘛, 你估買6合彩大包圍咩! 除咗考慮應唔應該使呢D錢嘅問題, 仲要考慮比狗狗做一大堆化驗係一個折磨嘛!
我唔做化驗連退燒藥都唔肯比, 話亂食有危險, 就咁番歸!
至於太X道, 無疑係一間大規模嘅寵物醫院, 設備完善, 但對一個新症我怕都少不免要做一大堆化驗, 我覺得無必要!
網上睇過都有唔少負面評語, 有D遲疑!
所以想搵番Hsiang醫生, 起碼唔使左驗右驗嘛, 但熟識佢哋病歷嘅Hsiang醫生又唔得閒, 無得睇, 咁點算????
再同波波探多次熱, 高到接近40, 39.8喇, 好驚!
發晒矛都唔知點算好, 諗起Ka有網上問診嘅Dr.Ku, 孤且試打去佢診所問, 當然佢都落咗班, 但有人聽電話; 問咗我情況後話會幫我問Dr.Ku, 無耐Dr.Ku親自覆我, 佢解答我好多問題; 佢話體溫高係一個症狀, 係佢打緊仗(我當然明白啦), 唔算太高又無明顯病徵可以觀察住, 有機會係不明病毒入侵佢自己會打得低; 佢話要睇佢可以過嚟同我睇, 但無必要我用咁多錢, 佢都唔想我咁花費, 除非波波情況變差! 佢話觀察一晚無問題, 如果有出病徵佢聽日同佢睇, 好多謝佢!
朋友A叫我打去pet Cxxxxxl問下, 佢哋再比我一個安心, 話其實39.3係可以接受嘅體溫, 39.5佢都係好微燒, 可以觀察一晚!
跟住佢問波波有無跑, 屋企氣溫等等!
佢一提起我就諗起同達達噴神奇水開大咗暖爐, 有無關係?
我都係決定觀察一晚, 無必要真係唔想去呢D夜診, 過去嘅經歷太耿耿於懷; 呢間診所無hard sell, 無嚇我話一定要去睇, 比我一個唔錯印像!
狗狗唔喺正常時間嚟病真係好攞命, 今晚我感受更深!!
一路觀察住隻衰豬仔, 餵佢飲水, 抹住腳枕仔; 精神好咗, 再探熱38.8, 比較安樂D喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
