 |
| 相片連結 |
琴日中午同3隻豬去街街, 自從波波整親腳仔, 今日係第一次比佢出去落地行, 之前都係比佢坐住車仔出去咋; 觀察咗兩日,覺得都無咩問題, 咁一切如常行番正軌喇!
雖然係中午時間, 但天氣涼咗, 換句話講, 呢個時間都適合狗狗散步啦, 所以琴日都見到有其他狗狗行街街!
同波波行嘅時候, 我都係用迴避政策, 見到前面有狗狗就轉身行, 有小朋友就利用小食, 不過波波開始都有吠小朋友, 但回程就安靜晒!
達達琴日好勇猛, 行得好好, 同佢行嘅時間遇到隻放繩poodle, 佢好熱情咁向住達達跑, 但達達唔鍾意呀; 佢向住狗狗大叫一聲, 嚇到隻poodle即刻調頭跑, 呢隻惡女真係巴辣; poodle主人都笑起上嚟 , 話佢狗仔細細, 脾氣咁大!
達達近來係多咗自信, 喺屋企都表現勇敢, 佢依家由廳入房, 再唔係好似以前咁鼓足勇氣向前猛衝, 可以慢慢行!
佢情緒係有好轉, 但毛髮就越嚟越差, 天氣漸涼, 預咗會咁喇; 希望今次再甩毛唔好影響到佢嘅自信, 不過都應該好難!
究竟脫毛症係身體邊一方面出咗毛病? 點解咁多年嚟都搵唔到對策 :(
最後到豆b行, 遇到隻放繩芝仔, 又跑過嚟想玩; 豆b當然無達達咁衰會趕客, 但又唔見得想同狗狗交際, 可能同性相拒, 佢唔鍾意呢個朋友仔啦; 於是拖住佢跟番我行, 佢好開心啊!
當然啦, 呢隻為食豬仔想我比零食嘛!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
