 |
| 相片連結 |
天氣漸涼, 要整理吓3隻豬仔嘅床鋪被褥, 呢D一定唔可以靠工人姐姐, 事實上佢哋嘅起居飲食我一向都係一手一腳自己嚟 :)
今日拎咗張梳化床出嚟, 咁耐無用D豬仔唔記得晒, 兩隻女貪新鮮鬥快爬上去, 意料之外係達達跑嬴!
波波呢個少爺仔慢條斯理咁行過去, 滿不在乎咁坐咗一陣, 就走過嚟我身邊叫我抱佢上床, 佢始終都要高人一等先安樂!
兩隻女就黐住一齊瞓覺, 想當日達達咁唔接受豆b, 點諗到今日會咁friend!
達達近來每每比我驚喜, 本來佢無地氈係唔會行出去, 但之前可以一鼓作氣咁由廳衝入房, 又由房衝出廳, 及後進步到可以慢慢行, 我哋見到佢有進步真係好安樂; 不過通常佢都係每日行兩, 三次就會停落嚟, 好似吹氣公仔漏晒氣; 但呢兩日見佢行完又行, 好似正常晒, 佢可以喺房同廳隨意走動, 完全無晒之前嘅障礙啦, 不過都係有時段限制, 有時好正常, 但唔係全日都OK!
今日我坐喺餐檯食早餐, 見到達達行咗過嚟, 佢從來無行過呢個方向嘅, 我吸住口氣都唔敢呼出嚟, 意外到O嘴！
咁多年來達達從未作過呢個嘗試, 姐姐剛想踏出廚房都縮番入去, 碌大對眼用手按住個嘴, 唔敢發出聲!
見達達若無其事咁行咗幾轉, 就走番入地氈, 可能佢突然記起佢行緊嘅地方係無鋪地氈, 又驚起上嚟!
仲差少少, 佢明顯係有進步嘅, 我要比多D耐心, 佢就要加D信心添!
今日係星期六, 外面一定比平日多狗狗, 咁出唔出去好呢?
以前我從無呢種concern, 當然都係深信狗狗咁細身, 喺屋內走吓都夠運動量, 但自從多咗出去, 達達嘅進步係顯而易見; 再者達達關節唔好, 除咗補充supplement都要關顧到要強化肌肉, 保護關節健康, 喺屋企佢明顯無出外行得咁順暢!
為咗達達有得出去行, 為咗幫波波避開狗狗, 唯有又落樓下 :(
今日平台上有好多小朋友, 我有D擔心波波情緒會失控, 同佢哋避埋一邊等佢哋先跑吓熱身; 波波今日算表現唔錯, 有小朋友同家長行埋嚟問我影張合照得唔得, 我話影可以隨便影, 但要自己就, 唔可以捉佢哋唔好強求, 仲有動作要溫柔; 結果小朋友行過嚟慢慢蹲低身, 豆b就上前舔人, 達達都企定喺左右, 波波只係退後咗兩步, 無吠又無走, 小朋友同3隻豬影完相好開心; 呢個小朋友好有禮貌, 過嚟同我講多謝姨姨！
我諗呢D小朋友波波感受到無壓力, 所以無走開, 又可能佢落地放咗繩, 無感受有阻截障礙！
我諗呢D小朋友波波感受到無壓力, 所以無走開, 又可能佢落地放咗繩, 無感受有阻截障礙！
跟住上返車仔兩頭遊, 雖然今日好多人, 但波波都再無吠小朋友喇; 不過, 好確定唔可以佢坐住車仔而向佢伸手, 有人突然跑過嚟要摸佢哋, 波波就一路吠一路退後, 連帶兩隻女都緊張晒, 一齊大合奏, 我唯有急急腳咁走!
今日3隻豬算係表現理想, 當然未可以無視人家突然伸手啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
