 |
| 相片連結 |
生活如常平靜, 週日同3隻豬遊吓花園, 盡量唔出去喇, 平日就揀選中午時間, 避開多人多狗嘅時段, 好似係一個消極嘅做法, 正係斬脚趾避沙虫, 但我真係無其他辦法, 仲未諗得通!
生活模式都係因人而異, 有人鍾意夜夜笙歌廣交朋友, 有人鍾意靜靜品嚐一杯茶讀一本書, 附庸風雅, 總之適合自己就好; 波波同達達唔鍾意嘅嘢我唯有避開唔做, 無謂叫佢哋一出外就加添壓力啦, 一般狗狗正常嘅生活, 強加於佢哋身上都未必係好, 算喇!
今日都係中午出動, 唯有呢種天氣先可以中午都咁舒服, 同佢哋行咗接近兩個鐘, 都無碰到狗狗, 佢哋明顯enjoyed咁跑吓; 偶然有小朋友經過, 都成功用小食避過波波去吠, 我好滿足喇; 只要佢哋放鬆, 我先會安樂, 同樣只要我無咁alert, 佢哋先會放鬆, 根本係互相影響!
都好耐無同朋友仔約會喇, 我都想再試吓放繩後嘅波波是否可以容納其他狗狗, 我唔奢望佢一定鍾意結交新朋友, 佢有絕對自由; 無上繩佢鍾意可以埋堆唔鍾意可以走, 咁會唔會無咁抗拒呢?
要再試試, 我真係好希望佢可以見吓朋友仔, 希望出外避唔到其他狗狗嘅時候, 佢唔會一見同類就當狗哋係洪水猛獸咁失晒控啦; 如果可以, 都仲有機會同其他狗狗一齊聚聚, 明明以前都得嘛, 唔得 - 就唯有放棄約會啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
