年初三, 好快新年嘅假期就過晒, 時間真係過得快!
今晚阿女又買咗新春嘅cupcake番黎, 依家D餅店真係主題多多, 做幾個特式應節設計, 就可以賣貴好多喇, 香港人都仲係聰明又有生意眼👍
阿女終於都買埋咗國泰航空嘅馬馬喇, 我鍾意成雙成對啦; 舊年一對蛇, 今年一對馬, 以前仲有一對兔兔添, 有無可能儲晒12生肖?
哈哈, 應該都無咁易喇!
我當然又捉住3隻豬影相啦; 今次D cupcakes 3隻豬有得睇無得食, 阿女話我好殘忍啊, 真可憐!
不覺間達達已經進行咗2週嘅順勢療法喇, 老實講改變唔大, 但總算無再惡化!
朋友L話我寸步不離咁用咗半個月時間, 得到嘅結果係咁有無失望, 佢話根本我咩都唔做, 達達都未見得會差落去啦!
可能事實真係如佢所講, 但叫我完全唔理任由佢發展落去, 天知道後果係咪可以控制; 當然有可能無變更壞, 但亦有可能變壞到超出預期; 如果我咩都無做去幫佢, 我諗我一定會內疚到死!
椎間盤退化, 大家都知若然有退化嘅物質突出而壓迫到脊髓, 唔做手術移除, 係無可能康復, 因為退化嘅物質唔會移返原位, 所做嘅保守治療, 只係希望佢唔好再惡化落去; 而我之前做針灸等等, 都係希望keep到一個較好嘅效果啦!
可惜兩個月落嚟, 達達似乎原地踏步, 而其間發生咗一個意外, 促使我放棄再針落去!
今次用順勢治療, 我係抱有好大寄望, 即使現階段無好大改變, 我仍會堅持落去; 曾經喺順勢網站睇過一個feedback, 狗狗都係到第3週先見到改善, 希望達達都係咁啦; 路只係行咗一半, 有可能柳暗花明又一村 😊
之後, 應該會用場效應治療同艾炙同佢keep啦, 藥係唔可以無止境咁食落去吧?!
一件物件已經破碎, 即使用膠水黐番, 我又點可能要求好似從來無碎? 同樣達達脊椎已經出咗事, 我又點可能執拗要求, 佢一定要康復到一如過去?
我再耿耿於懷, 憂慮再憂慮, 都只係同自己過唔去, 唯有日後小心照顧, 希望保住咁樣落去啦, 今後要將呢個破娃娃捧於手裡!
路! 都係咁行落去, 3隻豬年紀漸大, 我一定會遇到更多難題, 各器官老化嘅過程, 自然定率一定會慢慢差落去!
今後希望自己可以盡量放鬆, 唔好比自己壓力太大, 有問題盡能力解決, 但求問心無愧啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
