 |
| 相片連結 |
今日Mi問我達達情況係咪有改善, 應該係佢睇咗我琴日篇blog啦 :)
講真我係睇到達達有進步㗎, 但我有太多次沾沾自喜嘅經驗, 原來總係自己騙自己, 到頭來都係空歡喜啦; 今次我唔敢太早開心喇, 總之盡力去做好佢啦!
但事實總係事實, 眼見改善中嘅達達豬, 佢又回復好好中氣; 前段時間佢已經唔肯自己飲湯, 每次都要餵, 呢兩日就非常合作啦!
連我呢個工人姐姐都識配合, 見達達自動行埋碗湯, 都同我一齊屏住度氣, 深怕小小聲音都會嚇親呢個敏感嘅達達, 怕佢又唔飲行鬼咗去喇!
每次見佢舔得乾乾淨淨, 就好似上天嘅恩賜, 開心到死!
今日見佢無咩腳震, 應該講震得唔頻密, 開咗圍欄比佢出嚟行一陣, 等幾隻豬可以近距離親近啦; 達達好開心, 份外精神, 3隻豬有一段時間無咁喇!
呢隻豬太興奮喇, 開始快跑, 嚇得我又快快將佢困!
問Mi係咪完成4星期順勢療程就可以停, 佢話無作用當然係停,但有成效就食耐少少會較穩陣; 我拎樽藥出嚟望吓個指引, 睇睇有改善要點食法啦, “reduce frequency on improvement, to twice a day if needed” 咁由一日4次減到早晚, 再食多一個療程啦; 反正無副作用, 唔傷身; 一日兩次都容易處理, 並唔困身!
S從日本旅行番嚟問起達達, 嘆句呢隻豬咁多事㗎, 講笑話早知一早唔帶佢番屋企啦; 講比老公聽S嘅戲言, 老公話從來都無覺得達達係負累, 照顧佢從未有過怨言啦, 只要呢3隻豬健健康康, 幸福快樂, 就開心喇!
達達係老公嘅心頭肉, 每次放工番嚟第一個就搵達達, 只要達達開心, 佢做乜都得啦, 點會捨得唔照顧佢呀; 相反我哋慶幸達達跟咗我哋, 起碼已經確保我哋係盡心照顧佢嘛!
呢3隻豬係我哋嘅心肝椗, 一定要身體健康啊!
下面條片見到被困圍欄嘅曳達達, 猛轉圈嘈住晒,
其實咁轉法都驚整傷, 但無辦法叫停佢嘛 :(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
