 |
| 相片連結 |
今年真係凍咗好耐, 3隻豬好耐無沖涼喇, 今日天氣回暖, 即刻出動清潔3隻豬; 對twins毛毛又長又亂, 都要修吓喇; 因為要避開達達食藥時間, 今次比豆b做先頭部隊!
同呢隻豬剪毛真係特別攰, 佢永恆唔合作, 唔肯企定仲係咁瞓低; 一隻手要托住佢個身, 得一隻手行動, 真係考起 :(
佢雖然得1.6kg,但放軟晒個身我就好似拎住一袋米,做到手都震埋, 最煩係落剪好難睇嘛, 我呢D3腳貓工夫, 真係比佢玩死!
沖涼浸浴, 清潔埋眼耳口鼻, 足足用咗3個鐘, 真係跑馬拉松!
-horz.jpg)
跟住就到達達, 因為順勢療法嘅藥依家祇係食早晚, 咁中間都相隔好長時間, 問過Mi佢話用浴機係無問題; 因為達達早幾日修過毛毛, 今次凈係同佢按摩精華素, 跟住就浸浴, 咁簡單我利用呢段時間回吓氣啦!之前曾經有覺得達達毛髮好似有改善, 但今次沖涼, 又再確認佢係完全無好到, 不過今次我無之前咁失望, 我希望呢個只係一個過渡期啦; 可能今次達達椎間盤出事, 相比起甩毛呢個issue, 真係微不足道, 原來有比較下我先會將件事睇得通!
比起一個病患, 甩毛真係好小事, 當然要做嘅我仍然會盡量去做, 幸運嘅就希望佢係seasonal alopecia, 一如以往等天氣回暖就會好啦, 即使不然, 但求佢身體唔好再出事, 甩毛我都接受到喇!
最後要到寶貝仔波波喇, 你話我偏心都好啦, 波波真係乖到無譜㗎, 每次剪毛佢都會配合我, 無論我要佢企好坐好, 佢都無勞嘈; 人唔偏心真係好難做得到, 唔係話唔鍚其他兩隻寶, 但總有一隻係最窩心, 唔鍚佢多D好難做得到嘛, 哈哈哈!近排天氣凍, 我都驚波波腰仔又痛痛, 呢D筋骨問題最常復發就係冬季啦; 所以我都有幫波波做艾炙同場效應治療; 希望做多少少個仔會平安過渡！
同3隻豬做美容, 真係由早忙到晚, 咁當然有關我功夫有限啦;
但修剪吓點都整齊D嘅, 就當係一個親子活動 😊
之後比佢哋一齊玩玩, 一陣間都係要隔番開達達, 唔止係波波唔識就住玩, 連達達都忘記咗自己有事嘛, 放埋佢哋一齊就玩撲擊, 我怕咗喇！
豆b沖完微泡浴好似注入高能量, 猛咁追住波波, 波波今日同家姐又好老友喎; 達達都保持穩定狀態, 只要佢唔好激動咁兩頭衝, 基本上都無再腳震, 但後盤仍感覺未夠力, 希望比多D時間佢修復, 會更進一步啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
