 |
| 相片連結 |
呢幾日真係凍到飛起, 屋企開足暖爐都凍凍哋, 工人姐姐仲有D咳, 我要開窗唔敢焗住D空氣, 所以3隻豬都要著衫衫!
達達都仍然要困籠, 唔知係困籠少咗活動, 還是順勢嘅藥開始奏效, 抑或係我自己希望見到進步嘅幻覺, 我覺得佢開始有改進, 馬步比較穩喇, 轉圈仲快得驚人, 但我唔敢信自己對眼!
我最怕就係呢個小朋友無痛就以為自己無事, 大多數出事都係咁嘅原因, 除非入房我會抱佢上床同波波一齊瞓覺, 其他時候都係要困番!
波波好怕著衫, 我諗佢感覺被綁住晒, 苦埋口面唔開心啦; 即使好似逼佢受死, 但凍親感冒就唔係講玩; 仲記得嗰次要求Dr.T未開診都要幫佢診症, 因為驚佢肺炎; 達達已經好多事, 我唔可以再比對twins出事喇!
波波真係好鍚達達, 如果我困住達達喺圍欄, 佢都會隔住個欄坐另一邊陪佢, 即使我打開門佢都唔會走咗去, 剩低達達!
波波好乖, 知道喺床上唔可以好似以前咁同達達玩, 如果我抱達達上埋床, 佢會乖乖好放心瞓覺!
 |
| 遙望波波, 好慘慘！ |
呢D咁嘅天氣豆b氣管一定出事啦, 呼吸聲好大, 我要同佢著件樽領保護條頸, 仲要每日都比佢聞氣, 還好可以控制住; 狗狗真係好叻, 會知道自己有需要, 所以會配合療程!
仲有9日達達就完成順勢治療嘅療程, 希望有少少改善都好啦! 有句說法"The moment you're ready to quit is usually the moment right before the miracle happens", 咁我梗係會繼續落去啦！
我問工人姐姐有無覺得達達好咗, 佢反問乜我唔覺得咩, 我話怕睇錯嘛; 點知姐姐會答, 聽見達達嘅叫聲同飲湯咁急切, 仲行嚟行去, 同之前根本唔想行, 就知個分別啦!
嘩, 姐姐突然講嘢咁有邏輯, 又係咪我幻覺呀, 哈哈哈...
希望咁凍嘅天氣快D過去, 咁豆b氣管就無晒事; 達達要keep住唔好惡化, 要同佢練習慢慢行, 最重要就唔使成日隔開波波, 咁波波就會開心番:) 不過唔知點教育波波, 唔可以好似以前咁玩!
然後同佢哋去街街, 佢哋開心我就一天光晒!!!
至於達達又開始甩毛甩髻都由得佢啦, 希望如以往一樣遲吓會生番, 即使不然, 最緊要佢健健康康, 開開心心咁過活就好喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
