 |
| 相片連結 |
經過咗好長嘅一段時間, 日日都凍到死, 好耐無同3隻豬出去喇; 今日終於天氣回暖, 又有太陽, 就快快同佢哋出去, 曬吓太陽舒吓D悶氣啦!
都有D驚大風, 豆b係怕凍豬仔, 達達都皮毛疏咗, 唔知頂唔頂得住, 一陣冷一冷病咗就麻煩, 所以都同佢哋著件T-shirt料嘅衫打底!
 |
| 波波一吠連帶兩個女都緊張埋 |
今日一出街就後悔喇, 波波咁耐無出去實吠啦, 都係應該落樓下算喇; 反正達達又要從新習慣慢慢行; 比佢哋行咗一陣, 因為有太陽曬住真係好熱, 急急除衫！
達達豬可能係信心問題, 加上未完全好番卦, 行得麻麻; 因為佢唔敢正常咁慢慢行, 成日要衝住助跑, 就有影嚮佢步姿行得有D怪!
我都唔敢比佢行到路嘅盡頭, 因為係小斜路, 正常比佢哋鍛鍊肌肉就好好, 但現階段唔知達達椎間盤有幾壞, 我唔敢比佢行咁斜喇; 都係從路嘅中段開始比佢行, 比較平坦; 雖然佢行得麻麻, 但睇得出佢好鍾意去街街, 已經好耐無見嘅笑容今日從新掛喺面上, 笑得好燦爛!
祇要佢開心, 就多D同佢出去, 即使佢行得差, 甚至唔想行, 都可以坐住車仔去街街啦!
波波咁耐無出去, 我都知佢會緊張, 所以番上平台都係明志之舉; 因為少咗路人佢壓力無咁大, 平台上偶見有人路過都無嘈嘈閉喇; 不過 - 祗限於人哋無視於佢, 如果有人行埋去, 仲要好興奮咁撩佢哋, 佢就一定吠啦!
 |
| 人哋都係話你哋得意咋, 傻仔！ |
豆b從來都無問題, 3隻豬中最無所謂, 其實算最易話為; 不過壞脾氣培養好易, 依家都越嚟越曳曳!
佢都鍾意去街街, 不過佢行一陣就唔肯行, 可能係佢氣管差唔夠氣而唔係懶, 所以佢坐車仔遊花園仲啱, 只要有零食, 佢就覺得好歎 :)
不過佢今年都好叻女, 過渡咗咁凍嘅冬天都無事, 祇係聞咗幾次氣就舒緩落嚟, 都無須靠藥物幫助, 最多都係噴香薰幫吓佢;可能隻豬身體好咗D, 免疫力強咗, 依家呢個乞嗤公主真係少咗打乞嗤喇!
3隻豬身體都較以前強壯, 托賴無咩事, 可能D supplement真係幫到忙; 我希望正如網上所講, 保健品係一點一滴慢慢改善身體狀況, 佢唔係藥物, 係需要時間去為身體做個保護屏障!
至於達達嘅脫毛症係一個無頭公案, 想幫都唔知要點幫, 只好盡人事; 我最希望佢椎間盤唔好有惡化, 波波腰仔嘅骨刺可以保住無事, 豆b嘅氣管唔會越嚟越壞, 其他小毛小病ok啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
