樂樂, 又一年喇, 你離開咗我哋3年來, 日子過得好嗎?
近日睇到有網友討論你哋離開後, 將骨灰放屋企好唔好, 但從一開始我已經決定咁做, 因為我從來無諗過好定唔好, 變成咗理所當然!
當然有人講好或唔好, 但我覺得但求心之所安, 咁多年來, 你哋去咗彩虹橋嘅5寶, 一直無離開過我, 骨灰全都係放屋企度!
而我, 從來無覺得唔好, 可能我無宗教信仰, 考慮會較輕鬆啦:)
一直都係咁講, 一個生物死後只剩下一副臭皮囊, 火化成灰已如同廢物一樣!
我哋苦苦留下呢D灰燼, 只係想將思念有個實物付託; 如果玄D去講, 當呼吸停頓靈魂就已經離開身體隨處飄盪, 靈魂先係精靈所在, 有意識感覺; 如果我哋唔係假定咗留下嘅身體只係一個軀殼, 點會捨得選擇用熊熊烈火將佢火葬? 點解到頭來又嚟自己反駁?
我真係聽過好多唔同講法, 其實, 咁多唔同option, 都係比大家對號入座, 但求心之所安; 只要你相信咁係好, 就咁去做, 所有事都係觀點角度問題, 點去釐定對錯? 世事難有絕對啊!
我願意相信有彩虹橋, 我相信我嘅5寶會喺嗰度等我 :)
樂樂我相信你已經搵到叻叻, 喺彩虹橋上幸福咁生活, 日子開心咁過, 有無玩追波波?
彩虹橋上要互相幫助, 唔好再掛住只鍚叻叻一個, 要多關心精精, 安安同BeBe呢個老大哥!
樂樂喺5寶中雖然係最細個, 但一向有領導風範, 媽媽信得你過!
不過, 其實媽媽並唔瞭解樂樂, 我唔明最後階段你仍咁堅持所為如何? 係唔甘心比病魔折磨? 誓要對抗? 定係唔想離開我哋?
媽媽見你咁辛苦個心真係好難過, 但見你奮力對抗, 唯有盡量去幫啦; 後期見你失禁我知你好心傷, 驕傲嘅樂樂已經認命, 唔想再打仗!
樂樂, 忘記前生病魔帶比你嘅痛苦, 你到咗彩虹橋後從頭開始新生活, 你一定安排得好好!
從今以後再無疾病苦惱, 亦唔會再同叻叻分開, 願你哋永遠相愛!
親愛嘅5寶, 希望你哋相親相愛, 守望相助, 要記住媽媽嘅愛！
.jpg)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
