印像中我只係share過幾次呢類case, 因為唔係當事人怕有誤會, 唔想因為咁影響到人哋, 一般最多都係討論, 但唔會開名, 公平D!
但呢間動物醫院, 拉落去睇咁多負面事例, 即係唔係單一失誤事件, 最重要嘅係有我親身經歷, 咁多年嚟, 我每諗起都心痛到死, 會覺得係我害死我嘅寶貝仔!
想當年半夜3更, 叻叻抽筋, 我第一時間帶佢睇急症, 因為睇開嘅醫生話叻叻有輕微肺積水, 有抽筋就要立刻見醫生; 當時我住香港區, 就去咗呢度, 點知就送咗個仔去死!
當晚去到診所, D醫生無第一時間幫手, 我抱住抽筋嘅叻叻已經失禁, 屙到我身濕晒, 但呢度只同我講呢樣幾錢, 嗰樣幾錢, 望都無望叻叻; 我只係要求先救叻叻, 個醫生就發老脾走咗去, 咁我問姑娘咁算點, 依家睇唔睇?
姑娘就接過叻叻放入氧氣箱, 叫我番去, 佢哋會落藥; 當時心又亂又痛, 見個仔咁辛苦, 唔通抱佢走咩, 只好放低!
第二日一早想同叻叻出院,去番自己醫生度, 佢就嚇我話叻叻一離開氧氣箱有危險, 咁我唔敢強來, 再過咗一日接走叻叻, 因為見叻叻唔對路, 又唔肯食野!
當時帶叻叻去見番自己醫生, 佢睇咗FAX去嘅病歷, 話落咗太重嘅去水藥, 依家腎衰竭, 叫我比佢走, 因為尿毒已經好高!
當時真係晴天霹靂, 我無辦法接受到, 我做唔到!
我接受醫生唔係神仙, 唔係每一個病患都救到, 生有時死有時, 要走 - 做更多都於事無補; 但有無盡力? 有無因應各種因素小心落藥? 有無看重一個生命?
佢哋係一個動物, 但喺我哋心目中, 我哋係佢父母; 我哋寶貝交向你手上, 命仔就揸喺你度!
8年幾嚟, 呢件事一直都哽喺我個心度, 叻叻嘅離開我一直都放開唔到!
可能...佢都唔可以活好耐! 可能... 佢已經病入膏肓!
無人知, 但促使佢離開嘅結果, 唔應該係人為嘅因素!
唔係今次睇到呢個post, 我都驚係自己感情用事, 主觀上判咗呢間診所有錯!
識我嘅人都知我當佢哋如珠如寶, 如果有需要做嘅檢查化驗我一定做, 我唔會話攬住D錢當寶!
但呢間診所, 我入去咁耐就係聽到叫呢樣做嗰樣做, 都未掂過叻叻, 又會知要咁做? 還是大包圍當豪賭?
況且, 我都無話唔做, 只係叫佢救叻叻先, 佢好辛苦!
公平D講, 一間診所有好多醫生, 我遇到嘅係唔好; 咁有可能入面都有好醫生, 我唔知道!
但咁多事例, 咁多失誤, 呢間診所從無檢討? 真係唔簡單囉!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
