仲有唔足10日就到波波同豆豆嘅8歲生日, 當然係一貫做法, 同達達一齊慶祝啦, 3隻豬齊齊整整慶祝生日真係好幸福, 希望仲有好多年可以同佢哋3個一齊做生日 :)
根據下面嘅圖表, 佢哋將由成年踏入年長階段喇, 依家環境因素都好似比以前差, 空氣質素, 食物品質, 連食水都同以往有變化, 健康係備受考驗喇 ,希望把關嚴緊D, 3隻豬可以陪多我10年啦!
人生無好多個十年, 狗生, 大多數祇得一個咋!
健康問題真係好難管理, 除咗後天小心調較, 仲有先天因素影響, 再小心都係會出事; 只希望盡力令3隻豬生活得幸福愉快, 願我有能力做到最好啦!
原來近年好多場合都真係流行用cupcake慶祝, 最先留意到係結婚蛋糕, 跟住見到越嚟 越多人用cupcake代替大蛋糕!
由人伸展到狗狗生日, 我見到好多狗狗都用cupcake慶祝生日喇; 原來中外嘅趨勢都有改變呀, 有多個選擇總係好!
喺外國網站見到呢set cupcake裝飾, 好靚呀!
今次我嘗試自己做所有生日食物, 做埋cupcake :) 細細個難度無咁高!
裝飾就學人試吓用黏土做, 雖然唔係大師級創作, 但都花咗好多心機去整架!
多謝Mi幫忙幫我買咗啞色甲油, 希望今次順利, 唔會再出現花面貓; 不過有前科參考, 我唔會咁魯莽行事喇 ;)
今日少少哋同大家分享我用黏土做嘅裝飾啦!
因為距離中秋只係兩日之差, 所以一併慶祝埋中秋喇, 裝飾就有月亮同玉兔 :)
至於3隻豬仔嘅豬樣, 就賣吓關子, 等生日會同大家見面啦 ;D
 |
| 玉兔喺月亮裡面手持賀牌, 祝3隻豬生日快樂！ 藍天白雲月亮高掛, 幫3隻豬仔慶祝8歲生日！ |
